Maliyyə

Ana səhifə

Maliyyə

Azərbaycanda bankların ən yüksək likvidliyə malik olan aktivləri azalır

31 iyul 2009 09:55 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının aktivlərində əks olunan nağd vəsaitlərin həcmi 2009-cu ilin iyulun 1-nə 389 mln. manat təşkil edib. Azərbaycan Mərkəzi Bankından “APA-Economics”ə verilən məlumata görə, bankların müxbir hesablarında yerləşdirilmiş vəsaitlərin həcmi isə iyulun 1-nə 552,18 mln. manata bərabər olub.
Cari ilin əvvəlindən müqayisədə nağd vəsaitlərin həcmi 71,58 mln. manat və ya 15,5%, müxbir hesabların həcmi isə 407,34 mln. manat və ya 42,5% azalıb.
Qeyd edək ki, nağd vəsaitlər və müxbir hesablarda yerləşdirilmiş vəsaitlər ən yüksək likvidliyə malik olan aktiv hesab olunur. Belə ki, həmin aktivlər son 6 ay ərzində 478,92 mln. manat və ya 1,5 dəfə azalıb. Bankların yüksək likvid aktivlərinin azalmasına əsas səbəb dünya maliyyə böhranı nəticəsində bankların xaricdən fondlaşmanın azalması ilə paralel gedən xarici öhdəlikləri yerinə yetirməsidir. Bu azalmanın digər səbəbi kimi kredit bazarında vəziyyətin bir qədər sabitləşməsindən sonra banklar tərəfindən özlərində toplanmış və istifadə edilməyən vəsaitləri yenidən kreditlərin verilməsinə yönəltməsini qeyd etmək olar. Müqayisə üçün cari ilin əvvəlindən müştərilərə verilən kreditlərdə də azalma müşahidə olunsa da, azalmanın həcmi 11% təşkil edir.