Maliyyə

Ana səhifə

Maliyyə

Qlobal maliyyə böhranı dünya iqtisadiyyatına 10 trln. dollar ziyan vurub

03 avqust 2009 08:31 (UTC +04:00)

Bakı. Nicat Mustafayev – APA-Economics. Qlobal maliyyə böhranı dövründə dünya iqtisadiyyatına 10 trln. ABŞ dollarından artıq məbləğində zərər dəyib. «APA-Economics»in məlumatına görə, Beynəlxalq Valyuta Fondu (BVF) belə bir qənaətə gəlib.

BVF-nin hesablamalarına görə, varlı ölkələr öz maliyyə institutlarına yardım kimi 9,2 trln. dollar, Şərqi Avropa və keçmiş postsovet ölkələri isə bu məqsəd üçün 1,6 trln. dollar vəsait ayırıb. Ümumi vəsaitin 1,9 trln. dolları bilavasitə ödənişlərə, qalan hissəsi isə zəmanət və borcalmalara yönəldilib.

BVF ekspertlərinin fikrincə, iqtisadi vəziyyəti pisləşmiş maliyyə institutlarının durumunun yaxşılaşdırılmasına yönəldilmiş vəsaitlər sırasına 1,1 trln. dollar birbaşa sərmayələr, 1,9 trln. dollar – aktivlərin alınması, 4,6 trln. dollar – zəmanət, 2,5 trln. dollar isə likvidliyin təmin edilməsi məsrəfləri daxil olub.

BVF-nin hesablamalarına görə, 2014-cü ilədək Yaponiyanın dövlət borcu 239%, İtaliyada 132%, ABŞ-da 112%, Böyük Britaniyada isə 99,7% artacaq.

Bundan başqa, BVF dünya iqtisadiyyatının geriləməsinin müxtəlif ölkələrin büdcəsinə təsir səviyyəsinə yenidən baxır. Fondun mütəxəssislərinin fikrincə, 2009-cu ildə G20 ölkələrinin büdcələrində ÜDM-in 10,2%-i dəyərində kəsir yaranacaq ki, belə yüksək göstərici ilə həmin ölkələrin çoxu II Dünya Müharibəsindən sonra rastlaşmayıb.

Qeyd edək ki, bundan bir qədər öncə BVF Asiya ölkələrinin böhrandan daha tez çıxacağını da proqnozlaşdırıb.

Xatırladaq ki, cari ilin iyun ayında BVF Azərbaycanın 2009-cu il dövlət büdcəsində kiçik kəsirin olacağını proqnozlaşdırıb. BVF-nin 2009-cu ilin aprel ayının sonunadək dövrü əhatə edən Dünya İqtisadi Perspektivləri hesabatında qeyd olunub ki, 2009-cu ildə Azərbaycanın fiskal balansında kiçik kəsir olacaq, hökumətin xərcləri artacaq, 2010-cu ildə isə büdcədə profisitin müşahidə olunacağı gözlənilir. BVF-nin proqnozlarına əsasən, hazırda dünya bazarlarında neftin qiymətinin artması müşahidə olunur və əgər neftin qiymətinin artımı il boyu davam edərsə, Azərbaycanın 2009-cu il dövlət büdcəsində də kəsir müşahidə olunmayacaq, 2010-cu ildəki profisit isə proqnozdan daha yüksək ola bilər.

Qeyd edək ki, ötən il Azərbaycanın dövlət büdcəsinin gəlirləri 10,763 mlrd. manat, xərcləri isə 10,774 mlrd. manat təşkil edib. Nəticədə, büdcədə 11 mln. manatlıq kəsir yaranıb.