Maliyyə

Ana səhifə

Maliyyə

Azərbaycanda bank kreditlərinin regionlara verilməsi artmaqdadır

04 avqust 2009 09:19 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının məcmu kredit portfelinin strukturunda regionlara verilən kreditlərin xüsusi çəkisi 2009-cu ilin iyul ayının 1-nə 15,7% təşkil edib ki, bu da ötən ilin müvafiq dövrü ilə müqayisədə 2 faiz bəndi çoxdur.

Azərbaycan Mərkəzi Bankından «APA-Economics»ə verilən məlumata görə, Bakı şəhəri üzrə kredit qoyuluşlarının 51,1%-i milli valyuta, qalan 48,9%-i xarici valyuta ilə verilib. Regionlarda isə kredit qoyuluşlarının dollarlaşma səviyyəsi daha aşağıdır. Belə ki, cari ilin iyulun 1-nə regionlar üzrə kredit qoyuluşlarının 65%-i manatla, 35%-i isə xarici valyutada ayrılıb.

Ümumilikdə, ölkənin bölgələri üzrə kredit qoyuluşlarının strukturu aşağıdakı kimidir:

	01.07.2009	01.07.2008
Bakı	84,3%	86,3%
Abşeron	0,4%	0,2%
Sumqayıt	3,7%	2,9%
Gəncə	1,9%	2%
Naxçıvan	0,5%	0,3%
Lənkəran	0,7%	0,7%
Digər şəhər və rayonlar	8,5%	7,6%

Qeyd edək ki, bölgələrə verilən kreditlərin xüsusi çəkisinin artmasının Mərkəzi Bank tərəfindən regionların sosial-iqtisadi inkişafı istiqamətində görülən işlər və kredit təşkilatlarının regional şəbəkəsinin genişləndirilməsi ilə bağlıdır.

Cari ilin iyulun 1-nə bankların kredit qoyuluşlarının ümumi həcmi 6 463,8 mln. manata bərabər olub ki, bu da son bir ildə 4,5%-lik artım deməkdir.