Maliyyə

Ana səhifə

Maliyyə

Bu il Azərbaycanda 55 mln. manat həcmində dövlət ipoteka istiqrazlarının yerləşdiriləcəyi gözlənilir

04 avqust 2009 11:03 (UTC +04:00)

Bakı. Nicat Mustafayev – APA-Economics. Bu ilin sonunadək Azərbaycanda dövlət ipoteka istiqrazlarının ilk emissiyasının tam yerləşdiriləcəyi gözlənilir. «APA-Economics»in məlumatına görə, bunu Qiymətli Kağızlar üzrə Dövlət Komitəsinin (QKDK) sədri Rüfət Aslanlı bildirib.

R.Aslanlının sözlərinə görə, ilk ipoteka istiqrazlarının emissiyasının ümumi həcmi 55 mln. manat təşkil edir ki, bunun da 20 mln. manata yaxın hissəsi artıq yerləşdirilib: «Güman edirəm ki, cari ilin sonunadək istiqraz emissiyası tam yerləşdiriləcək».

QKDK-nın sədri onu da qeyd edib ki, ipoteka istiqrazları bazarında əsas investorlar rolunda milli fond bazarının iştirakçıları çıxış edir.

Qeyd edək ki, ötən iki ay ərzində müvəkkil kredit təşkilatları tərəfindən adi ipoteka krediti almaq üçün 1 200-dən artıq, güzəştli ipoteka krediti almaq üçün isə 150-yə yaxın vətəndaşın rəsmi müraciət ərizələri qəbul edilib. Daxil olmuş müraciətlər üzrə kredit məbləğlərinin ümumi həcmi 51 mln. manatdan çox olub. Bu məbləğin 5 mln. manata qədəri isə güzəştli ipoteka krediti almaq istəyən vətəndaşların müraciətləri olub. Bu müddət ərzində müraciət edən vətəndaşların 400-dən çoxu ipoteka kreditlərindən faydalana bilib. Verilmiş kreditlərin ümumi həcmi 17 mln. manatdan çox olub. Yalnız iyul ayı ərzində isə verilmiş ipoteka kreditlərinin həcmi 16 mln. manatı keçib.