Maliyyə

Ana səhifə

Maliyyə

Azərbaycanda RSI indeksi iyun ayında bir qədər azalıb

05 avqust 2009 13:36 (UTC +04:00)

Bakı. Vahab Rzayev – APA-Economics. Azərbaycanda Pərakəndə Satışlar İndeksi (Retail Sales Index – RSI) 2009-cu ilin iyun ayı üzrə 99,3% təşkil edib. «APA-Economics»in Dövlət Statistika Komitəsinin məlumatları əsasında apardığı hesablamalara görə, bu indeks may ayında 109,2%-ə bərabər olub ki, bu da həmin makroiqtisadi göstəricinin iyun ayında təxminən 10 faiz bəndi azalması deməkdir.

RSI indeksi ay ərzində satılmış malların (iaşə müəssisələri daxil olmaqla) ümumi dəyərinin əvvəlki ayın eyni həcmi göstəricisinə nisbəti kimi hesablanır. Məlumat üçün bildirək ki, cari ilin iyun ayında ümumi pərakəndə dövriyyəsi 937,1 mln. manat, may ayında 943,8 mln. manat, aprel ayında 864,4 mln. manat təşkil edib.

Qeyd edək ki, RSI indeksi pərakəndə ticarət sahəsində dövriyyə həcmlərinin dinamikasını əks etdirir. Nəticədə, pərakəndə ticarətin həcmi istehlak xərcləri göstəricilərindən biri olaraq istehlak tələbatı və istehlakçıların etimadı indikatoru kimi qiymətləndirilir. Həmin indeksin azalması hesabat ayında əvvəlki aya nisbətən ticarət və iaşə müəssisələri şəbəkəsində mal dövriyyəsinin azaldığını göstərir. Göründüyü kimi, iyun ayında pərakəndə əmtəə dövriyyəsinin həcmi təxminən may ayının səviyyəsində olub.