Maliyyə

Ana səhifə

Maliyyə

Azərbaycandakı banklar investisiyaları nəzərə çarpan dərəcədə artırıb

06 avqust 2009 07:45 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarının investisiyalarının həcmi 2009-cu ilin iyul ayının 1-nə 724,46 mln. manat təşkil edib. Azərbaycan Mərkəzi Bankından «APA-Economics»ə verilən məlumata əsasən, bu göstərici ilin əvvəlindən 71,31 mln. manat və ya 9% azalıb. Eyni zamanda, iyun ayında bankların investisiyaları 34,22 mln. manat və ya 5% artıb.

Qeyd edək ki, cari ilin ilk iki ayı ərzində müşahidə olunan 113,5 mln. manatlıq və ya 14,3%-lik azalmadan sonra bankların investisiyaları hər ay təxminən 10-12 mln. manat həcmində artıb və ya azalırdı. Və yalnız iyun ayında bu göstərici üzrə artmağa doğru nəzərə çarpan dəyişmə baş verib.

İnvestisiyaların strukturunda müəyyən hissə qiymətli kağızlar, xüsusən də dövlət qiymətli kağızlarına yönəldilən vəsaitlərin payına düşür. Lakin bu vəsaitlər investisiyaların əsas hissəsini təşkil etmir. Belə ki, iyulun 1-i vəziyyətinə dövriyyədə 154,6 mln. manat həcmində dövlət istiqrazları və yalnız 16 mln. manatlıq Mərkəzi Bankın notları olub. Dövlət istiqrazlarının tam həcmi məhz banklar tərəfindən alınmır, çünki bu bazarda sığorta şirkətləri kimi digər investorlar da iştirak edir. Nəticədə, demək olar ki, bankların investisiyalarının yalnız 20%-i dövlət qiymətli kağızlarının payına düşür. Qalan hissə isə daha real investisiyalar kimi yerləşdirilib.

Qeyd edək ki, korporativ qiymətli kağızlara, o cümlədən pay iştirakı kimi qiymətləndirilən səhmlərin alınması dövlət qiymətli kağızlara edilən investisiyalarla müqayisədə iqtisadiyyata daha fayda verən sərmayə qoyuluşu hesab olunur.