Maliyyə

Ana səhifə

Maliyyə

Azərbaycanda POS-terminal şəbəkəsi son bir ildə 24% genişlənib

07 avqust 2009 07:54 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən bank təşkilatları tərəfindən quraşdırılan POS-terminalların ümumi sayı 2009-cu ilin iyul ayının 1-nə 8 532 ədəd təşkil edib ki, bu da ötən ilin müvafiq dövrü ilə müqayisədə 1 643 vahid və ya 24% çoxdur. Azərbaycan Mərkəzi Bankından «APA-Economics»ə verilən məlumata görə, ilin əvvəli ilə müqayisədə bu göstərici 408 vahid və ya 5% artıb.

Quraşdırılan POS-terminalların 7 787 ədədi və ya 91%-i pərakəndə, iaşə və digər xidmət müəssisələrində fəaliyyət göstərir. Eyni zamanda, POS-terminalların 7 753 ədədi və ya 91%-i Bakıda quraşdırılıb.

Qeyd edək ki, POS-terminalların sayının tədricən artmasına baxmayaraq, bu sahədə hələ də vəziyyət tam bazar iqtisadiyyatına uyğun kimi qiymətləndirilə bilməz. Belə ki, Azərbaycanda təkcə pərakəndə və iaşə müəssisələrinin sayı 8,5 mindən çoxdur və bu sahədə POS-terminalların quraşdırılması prosesi çox ləng gedir.

Xatırladaq ki, POS-terminalların əsas vəzifəsi pərakəndə mal dövriyyəsində nağdsız hesablaşmaların təşkilindən ibarətdir ki, bu da ölkənin sosial-iqtisadi inkişafı, vergidən yayınma halların azaldılması, hətta pul-kredit siyasətinin düzgün aparılmasına imkan yaradılması baxımından çox əhəmiyyətlidir.