Maliyyə

Ana səhifə

Maliyyə

Bakıda Azərbaycan-Latviya hökumətlərarası komissiyasının iclası keçirilir - FOTOSESSİYA

Bakıda Azərbaycan-Latviya hökumətlərarası komissiyasının iclası keçirilir - <font color=red>FOTOSESSİYA</font>

11 avqust 2009 12:16 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan-Latviya iqtisadi, elmi, texniki və mədəniyyət məsələləri üzrə hökumətlərarası komissiyasının iclası işə başlayıb.

«APA-Economics»in məlumatına görə, Azərbaycan tərəfindən komissiyaya həmsədrlik edən nəqliyyat naziri Ziya Məmmədov qeyd edib ki, iki ölkə arasında artıq bir sıra ikitərəfli sənəd imzalanıb və Azərbaycan-Latviya əlaqələri ildən-ilə genişlənir. «Bunun nəticəsi olaraq, iki ölkə arasında ticarət dövriyyəsi iki dəfə artıb, siyasi və iqtisadi əlaqələr də inkişaf etməkdədir. Ümid edirəm ki, Azərbaycanla Latviya arasında münasibətlər yaxın illər ərzində daha da genişlənəcək», - deyə Z.Məmmədov vurğulayıb.

Azərbaycanın iqtisadi inkişafından danışan nəqliyyat naziri həmçinin bildirib ki, son 5 il ərzində respublikada ümumi daxili məhsul (ÜDM) 2,7 dəfə, 2008-ci ildə isə 16,5% artıb: «Cari ilin ilk yarısında ölkədə ÜDM-in artım tempi 3,6%, qeyri-neft sektoru 4,1%, orta əmək haqqı 15% artıb, inflyasiyanın səviyyəsi isə 3,7% təşkil edib».

Azərbaycanın nəqliyyat sektorunun inkişafından və bu sahədə həyata keçirilən layihələrdən məlumat verən Z.Məmmədov onu da bildirib ki, növbəti illər ərzində də Azərbaycan nəqliyyat sahəsində bir sıra layihə icra edəcək. Nazir həmçinin vurğulayıb ki, Azərbaycan Latviya ilə kənd təsərrüfatı, nəqliyyat, turizm və digər sahələrdə əməkdaşlıq etməkdə maraqlıdır.

Komissiyanın Latviya tərəfindən olan həmsədri, nəqliyyat naziri Kaspars Gerhards isə öz növbəsində bildirib ki, iki ölkə arasında əməkdaşlıq stabil olaraq inkişaf edir: «Azərbaycanla Latviya arasında mövcud ticarət dövriyyəsini buna misal gətirmək olar. Belə ki, 2008-ci ildə iki ölkə arasında ticarət dövriyyəsi 60,1%, cari ilin ilk beş ayı ərzində isə 57% artıb. Buna baxmayaraq, ticarət dövriyyəsini daha da artırmaq üçün hər iki ölkənin geniş potensialı mövcuddur».

K.Gerhardsın sözlərinə görə, iki ölkə arasında ticarət, yüngül sənaye, energetika, maliyyə, turizm, nəqliyyat, logistika və digər sahələr üzrə əlaqələri daha da inkişaf etdirmək olar.

Qeyd edək ki, görüşün sonunda iki ölkə arasında yekun protokol imzalanacaq.