Maliyyə

Ana səhifə

Maliyyə

«Texnikabank» nizamnamə kapitalını 55% artırıb

17 avqust 2009 10:23 (UTC +04:00)

Bakı. Vahab Rzayev – APA-Economics. Azərbaycanın «Texnikabank» ASC-nin ümumi gəlirləri son dörd ayda ardıcıl olaraq yüksək artım nümayiş etdirməkdədir. Bankdan «APA-Economics»ə verilən məlumata görə, son iki ayda bu artım 17%-dən artıq olub, hesabat dövrünün sonuna bankın ümumi gəlirləri 39,3 mln. manat səviyyəsinə çatıb. İyul ayı ərzində bankın faiz gəlirlərinin artımı 16,4%, qeyri-faiz gəlirlərinin artımı isə 20,8% olub. Hesabat dövrünün sonuna bankın xalis mənfəəti isə 9,5 mln. manat təşkil edib.

Hesabat dövrünün sonuna bankın məcmu kapitalı 60,1 mln. manat təşkil edib ki, bu da ilin əvvəli ilə müqayisədə 16,5% çoxdur. Hesabat dövrü ərzində bankın kapitalının gəlirliyi 17,5% təşkil edib. Cari ilin iyul ayında keçirilmiş bankın səhmdarlarının ümumi yığıncağı bu günədək əldə olunmuş mənfəətin nizamnamə kapitalının artırılmasına yönəldilməsi haqqında qərar qəbul edib. Nəticədə, bankın nizamnamə kapitalı 26,9 mln. manatdan 41,7 mln. manata, yəni 55% yüksəlib.

İyulun 31-nə «Texnikabank»ın aktivlərinin həcmi 458 mln. manat, aktivlərin gəlirliyi isə 2,13% olub.

Cari ilin iyul ayı ərzində «Texnikabank» ASC-nin cəlb etdiyi müddətli depozitlərin həcmi 6,6% artaraq, iyulun 31-nə 91,5 mln. manat səviyyəsinə çatıb. Ay ərzində fiziki şəxslərin bankda yerləşdirdiyi əmanətlərin həcmi isə 4,1% artıb və iyul ayının sonuna 93,6 mln. manat təşkil edib. Hesabat dövrünün sonuna bankın depozit portfelinin ümumi həcmi isə 164,6 mln. manat olub.

Bankın kredit portfelinin həcmi hesabat dövrünün sonuna 352,2 mln. manat olub ki, bu da ilin əvvəli ilə müqayisədə 7,2% çoxdur. İyul ayının sonuna bankın fiziki şəxslərə təqdim etdiyi istehlak kreditlərinin həcmi 57,5 mln. manat təşkil edib.

İyul ayı ərzində bankın emissiya etdiyi plastik kartların sayı 12,1% artaraq, ayın sonuna 43 minə çatıb. Hesabat dövrünün sonuna plastik kart sahiblərinin istifadəsinə verilmiş bankomatların sayı 48, POS-terminalların sayı isə 341 olub.