Maliyyə

Ana səhifə

Maliyyə

Azərbaycanda əsas kapitala yönəldilən sərmayənin 17%-i xarici investorların payına düşür

18 avqust 2009 12:43 (UTC +04:00)

Bakı. Nicat Mustafayev – APA-Economics. Bu ilin yanvar-iyul aylarında Azərbaycanın iqtisadi və sosial sahələrinin inkişafı üçün bütün maliyyə mənbələrindən əsas kapitala 4 082,5 mln. manat investisiya yönəldilib.

Dövlət Statistika Komitəsindən «APA-Economics»ə verilən məlumata görə, dövlət mülkiyyətinə məxsus müəssisə və təşkilatlar əsas kapitala 2 477,4 mln. manat və ya ümumi investisiyanın 60,7%-i, qeyri-dövlət müəssisələri 1 605,1 mln. manat və ya 39,3%-i qədər sərmayə qoyub. Tikinti-quraşdırma işlərində istifadə edilmiş investisiyanın həcmi əvvəlki ilin müvafiq dövrü ilə müqayisədə 1,5% artaraq 2 875,5 mln. manat olub. İstehsal təyinatlı obyektlərin inşasında 3 171,4 mln. manat, qeyri-istehsal təyinatlı obyektlərin tikintisində 911,1 mln. manatlıq investisiyadan istifadə edilib.

Hesabat dövründə əsas kapitala yönəldilmiş daxili investisiyaların həcmi xarici investisiyaları üstələyib. Belə ki, əsas kapitala yönəldilmiş vəsaitin 82,7%-ni daxili investisiyalar, 17,3%-ni isə xarici investisiyalar təşkil edib. Daxili investisiya əvvəlki ilin müvafiq dövrünün səviyyəsini 6,8% üstələyib. Əsas kapitala yönəldilmiş daxili investisiyanın 69,7%-i dövlət mülkiyyətinə məxsus müəssisə və təşkilatların, 30,3%-i isə qeyri-dövlət mülkiyyətinə məxsus müəssisələrin payına düşür.

Bundan başqa, 2009-cu ildə büdcədən maliyyələşdirilməsi nəzərdə tutulmuş inşaat işlərini həyata keçirmək üçün dövlət büdcəsində 4,718 mlrd. manat vəsait nəzərdə tutulmuşdur. İlin yeddi ayında bu vəsaitin 1 402,2 mln. manatından istifadə edilib.

Əsas kapitala yönəldilmiş sərmayənin ümumi həcmində müəssisə və təşkilatların vəsaitləri 1 966,2 mln. manat (ümumi investisiyanın 48,2%-i), bank kreditləri 186,5 mln. manat (4,6%-i), büdcə vəsaitləri 1 516,7 mln. manat (37,1%-i), büdcədənkənar fondların vəsaitləri 272 mln. manat (6,7%-i), əhalinin şəxsi vəsaitləri 140,8 mln. manat (3,4%-i), digər vəsaitlər isə 0,3 mln. manat təşkil edib.

Qeyd edək ki, bu ilin əvvəlindən əsas kapitala yönəldilmiş bütün investisiyanın 39,3%-i sənaye sahələrinin inkişafına, 3,7%-i kənd təsərrüfatına, 0,1%-i balıqçılığa, 0,7%-i tikintiyə, 2,5%-i ticarət və xidmətə, 3,2%-i mehmanxana və restoranlara, 26,4%-i nəqliyyata, 1,9%-i rabitəyə, 0,2%-i maliyyəyə, 10,7%-i daşınmaz əmlakla əlaqədar əməliyyatlara (ondan 8,8%-i mənzil tikintisinə), 4,6%-i dövlət idarəetməsinə, 1,2%-i təhsilə, 1,8%-i səhiyyəyə, 3,7%-i digər kommunal, sosial və şəxsi xidmətlərin göstərilməsi sahələrinə sərf edilib.