Maliyyə

Ana səhifə

Maliyyə

Azərbaycan manatının real effektiv məzənnəsi bahalaşıb

26 avqust 2009 12:47 (UTC +04:00)

Bakı. Vahab Rzayev – APA-Economics. Azərbaycanda manatın nominal effektiv məzənnəsi 2009-cu ilin yanvar-iyul aylarında ümumi ticarət dövriyyəsi üzrə 0,4%, idxal çəkili 1,7% bahalaşıb, ixrac çəkili isə 0,7% ucuzlaşıb. «APA-Economics»in məlumatına görə, bu barədə Azərbaycan Mərkəzi Bankının «2009-cu ilin yanvar-iyul aylarının yekunu üzrə manatın ikitərəfli və effektiv məzənnə indekslərinin vəziyyəti barədə İcmal»da bildirilir. İyun ayına nisbətən nominal effektiv məzənnə ümumi ticarət dövriyyəsi üzrə 0,1% yüksəlib, idxal çəkili 0,1% bahalaşıb və ixrac çəkili 0,2% ucuzlaşıb.

Qeyd edək ki, manatın nominal effektiv məzənnəsi Azərbaycanın ticarət tərəfdaşı olan ölkələrin valyutalarına nəzərən ikitərəfli nominal məzənnələrin dəyişməsinin ticarət xüsusi çəkiləri nəzərə alınmaqla həndəsi ortasını əks etdirir.

Mərkəzi Bankın hesablamaları göstərir ki, 2009-cu ilin yanvar-iyul ayları ərzində qeyri-neft sektoru üzrə nominal effektiv məzənnə ümumi ticarət dövriyyəsi, idxal, həmçinin ixrac çəkili müvafiq olaraq 4%, 3,5% və 6,4%, əvvəlki aya nisbətən isə müvafiq olaraq 0,3%, 0,2% və 0,8% bahalaşıb.

Ticarət tərəfdaşı olan ölkələrin valyutalarına nəzərən ikitərəfli real məzənnələrin dəyişməsinin ticarət xüsusi çəkiləri nəzərə alınmaqla həndəsi ortasını əks etdirən manatın real effektiv məzənnəsi isə 2009-cu ilin yanvar-iyul aylarında ümumi ticarət dövriyyəsi üzrə 4,2%, idxal çəkili 3,6%, ixrac çəkili 4,6% ucuzlaşıb. İyun ayına nisbətən isə müvafiq olaraq 0,8%, 0,9% və 0,9% bahalaşma qeydə alınıb. Qeyri-neft sektoru üzrə real effektiv məzənnə ümumi ticarət dövriyyəsi üzrə 2,3%, idxal çəkili 2,6%, ixrac çəkili 1,4% ucuzlaşıb, əvvəlki aya nisbətən isə müvafiq olaraq 1%, 1% və 1,3% bahalaşma müşahidə olunub.

Azərbaycanın xarici ticarət şəraitini xarakterizə edən indekslər (%)

	Nominal effektiv məzənnə indeksi			Real effektiv məzənnə indeksi
	Ticarət dövriyyəsi üzrə	İdxal üzrə	İxrac üzrə	Ticarət dövriyyəsi üzrə	İdxal üzrə	İxrac üzrə
Dekabr 2008	100	100	100	100	100	100
Yanvar	103.0	104.0	102.2	102.0	102.6	101.5
Fevral	107.9	109.3	106.6	105.5	106.6	104.7
Mart	107.9	109.7	106.4	104.2	105.2	103.3
Aprel	106.0	107.4	104.8	101.8	102.4	101.1
May	102.9	104.1	101.8	98.2	98.6	97.7
İyun	100.5	101.7	99.5	95.0	95.5	94.6
İyul	100.4	101.7	99.3	95.8	96.4	95.4

Mərkəzi Bankın hesablamalarına görə, yanvar-iyul aylarında ümumi ticarət dövriyyəsi üzrə real effektiv məzənnəyə nominal valyuta məzənnələrinin dinamikası artırıcı, qiymətlərin dinamikası isə azaldıcı təsir göstərib.