Maliyyə

Ana səhifə

Maliyyə

«Azərdəmiryolbank» xaricdən yeni kredit cəlb edib

01 sentyabr 2009 09:10 (UTC +04:00)

Bakı. Elnur Hüseynquluyev – APA-Economics. Azərbaycanın «Azərdəmiryolbank» Səhmdar Kommersiya Bankı (SKB) İsveçrənin «Symbiotics SA Information, Consulting & Services» şirkəti tərəfindən təşkil olunmuş və Lüksemburqun «Dual Return Fund S.I.C.A.V.» şirkətinin vəsaiti hesabına maliyyəşdirməsini nəzərdə tutan yeni kredit müqaviləsi imzalayıb.

Bankın baş ofisindən «APA-Economics»ə verilən məlumata görə, bu müqavilə çərçivəsində «Azərdəmiryolbank» 3 mln. ABŞ dolları məbləğində vəsait cəlb edib. Müqavilə iki il müddətinə imzalanıb və cəlb edilmiş vəsaitin mikrokreditləşmə əməliyyatlarına yönəldilməsi nəzərdə tutulur.

Bankın İdarə Heyətinin sədr müavini Yusif Cabbarovun sözlərinə sözlərinə görə, sosial yönümlü siyasətə əsaslanaraq bir çox layihə həyata keçirən «Azərdəmiryolbank» ölkədə mikrokreditləşmənin inkişafına və genişlənməsinə böyük önəm verir: «Bazarın kütləvi seqmentlərindən olan mikrokreditləşmə Bakıda və regionlarda kiçik sahibkarlığın inkişafına, məşğulluğun və əhalinin geniş təbəqəsinin rifahının yaxşılaşdırılmasına xidmət edir».

Xatırladaq ki, «Azərdəmiryolbank» SKB-nin 850-yə yaxın səhmdarı var. Bankın nizamnamə kapitalında «25%+1 səhm» Avropa Yenidənqurma və İnkişaf Bankına (EBRD), 10% Hollandiyanın Maliyyə İnkişaf Şirkətinə (FMO), 10% hüquqi şəxslərə, qalanı isə fiziki şəxslərə məxsusdur. Bank 1989-cu ildə təsis edilib və hazırda respublika üzrə 29 filialı, 40 bankomatı və 240 POS-terminalı fəaliyyət göstərir.