Maliyyə

Ana səhifə

Maliyyə

«Turan Bank» üç yeni beynəlxalq pulköçürmə sisteminə qoşulacaq

04 sentyabr 2009 12:20 (UTC +04:00)

Bakı. Elnur Hüseynquluyev – APA-Economics. Azərbaycanın «Turan Bank» səhmdar Kommersiya Bankı (SKB) yaxın günlərdə «Allur» beynəlxalq pulköçürmə sistemi üzrə xidmətlərə başlayacaq. Bunu «APA-Economics»ə açıqlamasında bankın strateji planlama və beynəlxalq əlaqələr şöbəsinin müdiri Rəşad Tanrıverdiyev bildirib.

R.Tanrıverdiyevin sözlərinə görə, artıq bankla sistem arasında bütün sənədləşmə prosesi başa çatıb: «Yalnız testləşdirmə və texniki işlər qalıb ki, bu proses artıq yaxın günlərdə tam başa çatdırılacaq».

R.Tanrıverdiyev bildirib ki, «Allur» sistemindən başqa bank daha iki sistemə («Lider» və «Zolotaya Korona») qoşulmaq niyyətindədir: «Hazırda bu sistemlərin bankda tətbiqi üçün müvafiq sənədləşmə işləri aparılır. Ümid edirəm ki, bankın müştəriləri 2010-cu ilədək hər iki yeni sistemin xidmətlərindən istifadə etməyə başlayacaq».

Qeyd edək ki, bununla da bankın üzv olduğu beynəlxalq pulköçürmə sistemlərinin sayı 7-yə çatacaq.

Xatırladaq ki, təsisçisi 5 hüquqi (20%) və 20 fiziki şəxs olan (80%) «Turan Bank» SKB 1992-ci ildən fəaliyyət göstərir. Bankın respublika üzrə 11 filialı var. Cari ilin iyul ayının 1-nə bankın aktivlərinin həcmi 81,6 mln. manat, kredit portfeli 62,3 mln. manat, depozit portfeli 22,796 mln. manat, məcmu kapitalı 19,7 mln. manat, o cümlədən, nizamnamə kapitalı 17 mln. manat təşkil edib.