Maliyyə

Ana səhifə

Maliyyə

Son bir ildə Azərbaycanda bank kreditlərinin həcmi 14% artıb

07 sentyabr 2009 13:51 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kredit təşkilatları üzrə 2009-cu ilin iyul ayının sonuna kredit qoyuluşlarının həcmi ötən ilin müvafiq dövrü ilə müqayisədə 13,6% artaraq 7 229,2 mln. manat təşkil edib. «APA-Economics»in məlumatına görə, bu barədə Azərbaycan Mərkəzi Bankı tərəfindən hazırlanmış «Kredit qoyuluşların vəziyyəti barədə icmal»da deyilir.

İcmala əsasən, iyulun sonuna cəmi kredit qoyuluşlarının 97,5%-ni banklar, 2,5%-ni isə qeyri-bank kredit təşkilatları tərəfindən ayrılan kreditlər təşkil edib. Ötən ilin müvafiq dövrü ilə müqayisədə bankların kredit qoyuluşları 13,6%, qeyri-bank kredit təşkilatlarının kreditləri isə 13,9% artıb. Qeyri-bank kredit təşkilatlarının kredit qoyuluşlarında «Aqrarkredit» qeyri-bank kredit qurumunun payı 8,6%-ə bərabər olub.

Kredit qoyuluşlarının strukturunda ən iri həcm göstəricisi hələ də fiziki şəxslər üzrə müşahidə olunur:

	01.08.2009 (mln. manat)	Xüsusi çəki, %	Nisbət (01.08.2009), %
*Qeyri-maliyyə müəssisələri olan hüquqi şəxslər*	*4 695,2*	*67,4*	*19,2*
Ticarət və xidmət	1 372,8	19,7	-11
Energetika və təbii ehtiyatlar	997,7	14,3	17,7
Kənd təsərrüfatı və emal	351,1	5	41,8
İnşaat və əmlak	657,8	9,4	37,8
Sənaye və istehsal	530,8	7,6	39,5
Nəqliyyat və rabitə	467,6	6,7	29
Dövlət idarəetməsi	0,5	0,01	7
Digər kredit əməliyyatları	317	4,6	4 dəfə
*Fiziki şəxslər*	*2 271,6*	*32,6*	*-1,9*

* vaxtı keçmiş kreditlər nəzərə alınmadan

Qeyd edək ki, ötən ilin avqustun 1-nə olan analoji göstəricilərlə müqayisədə manatla kredit qoyuluşları 11,8%, xarici valyuta ilə kredit qoyuluşları isə 15,8% artıb. Nəticədə, cəmi kredit qoyuluşlarının 53,3%-ni milli valyuta, qalan hissəsini isə xarici valyutada ayrılan kreditlər təşkil edib.