Maliyyə

Ana səhifə

Maliyyə

«Turan Bank» «World Business Capital»dan 7,5 mln. dollarlıq kredit cəlb edib

09 sentyabr 2009 12:38 (UTC +04:00)

Bakı. Elnur Hüseynquluyev - APA-Economics. Azərbaycanın «Turan Bank» Səhmdar Kommersiya Bankı (SKB) ABŞ-ın «World Business Capital» maliyyə təşkilatından 7,5 mln. ABŞ dolları həcmində kredit cəlb edib. Bunu «APA-Economics»ə açıqlamasında bankın strateji planlama və beynəlxalq əlaqələr şöbəsinin müdiri Rəşad Tanrıverdiyev bildirib.
R.Tanrıverdiyevin sözlərinə görə, birinci ili güzəştli olmaqla 10 il müddətinə cəlb edilmiş vəsaitlər bank tərəfindən kiçik və orta sahibkarlığın kreditləşdirilməsinə sərf ediləcək.
R.Tanrıverdiyev qeyd edib ki, «Turan Bank» ABŞ-ın Finance Service Voluntary Corps (FSVC) təşkilatı ilə də texniki yardım müqaviləsi imzalayıb. Müqaviləyə əsasən, beynəlxalq təşkilat tərəfindən göstərilən texniki yardım bankın aktiv-passivlərinin və risklərin idarə edilməsi, çirkli pulların yuyulması, məlumat informasiya sisteminin yaradılması, həmçinin yeni məhsul və marketinqin inkişafı sahələrini əhatə edəcək: «Texniki yardım üzrə müqavilə 5 il müddətinə imzalanıb. Artıq yardımın birinci tranşı cari ilin iyun ayında, ikinci tranşı isə bu gün ayrılacaq».
Xatırladaq ki, təsisçisi 5 hüquqi (20%) və 20 fiziki şəxs olan (80%) «Turanbank» SKB 1992-ci ildən fəaliyyət göstərir. Bankın respublika üzrə 11 filialı mövcuddur.
Cari ilin iyul ayının 1-nə bankın aktivlərinin həcmi 81,6 mln. manat, kredit portfeli 62,3 mln. manat, depozit portfeli 22,796 mln. manat, məcmu kapitalı 19,7 mln. manat, o cümlədən nizamnamə kapitalı 17 mln. manat təşkil edib.