Bakı - APA. Sentyabrın 3-7-də Qırğızıstanın Çolpon-Ata şəhərində “Ümumdünya Köçəri idman oyunları” keçiriləcək.
Gənclər və idman naziri Azad Rəhimovun başçılıq etdiyi nümayəndə heyəti Azərbaycan adından tədbirə qatılacaq.
Gənclər və İdman Nazirliyinin mətbuat katibi Səmayə Məmmədova APA-ya bildirib ki, tədbir çərçivəsində qonaqlar üçün “Kırçın” vadisində “Köçməndər Aalamı” festivalı baş tutacaq. Festival çərçivəsində Qırğızıstanın ümumilikdə 300-ə yaxın müxtəlif region və şəhərlərinin milli mətbəxi, adətləri, dekorativ atributları və digər maraqlı nümunələri təqdim olunacaq.
Bununla yanaşı, sentyabrın 5-7-də tədbir iştirakçılarının “WorldNomadFest 2016” festivalı çərçivəsində etnomoda, etnoxit və etno rəqslər istiqaməti üzrə çıxışları olacaq.
Ümumilikdə “Ümumdünya Köçəri idman oyunları”nda 53 ölkədən 23 idman növü üzrə 2000 idmançının iştirakı nəzərdə tutulub.
Azərbaycan bu yarışa 9 idman növü üzrə 38 idmançı, 6 hakim, 5 məşqçi və 3 musiqiçi ilə qatılacaq. İdmançılarımız öz qüvvələrini Milli güləş, Alış güləşi, Aba güləşi, Türkmən güləşi, Qazax güləşi, Qırğız güləşi, Mas-Reslinq, Er-Eniş (at üstündə güləş) və ənənəvi kamandan ox atma idman növlərində sınayacaq.
Tədbirin açılış mərasimi və yarışlar Çolpon-Ata şəhər hippodromunda keçiriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
