Azərbaycan Milli Elmlər Akademiyasının (AMEA) Nəsimi adına Dilçilik İnstitutunun təşkilatçılığı ilə 21 Fevral - Beynəlxalq Ana Dili Gününə həsr olunmuş konfrans keçirilib.
APA-nın xəbərinə görə, Dilçilik İnstitutunun direktoru, AMEA-nın müxbir üzvü, professor Möhsün Nağısoylu Beynəlxalq Ana Dili Gününün yaranma tarixi haqda məlumat verib.
O həmçinin bildirib ki, İnstitutda "Monitorinq" şöbəsi yaradılıb. M. Nağısoylunun sözlərinə görə, İnstitutda fəaliyyət göstərən "qaynar xətt"ə daha çox ədəbi dil normalarının pozulması ilə bağlı zənglər daxil olur.
Direktor qeyd edib ki, sovet vaxtı ana dilində danışanlara xor baxırdılar: "Müstəqilliyimizi bərpa etdikdən sonra ana dilinə qayğı artmağa başlandı. Lakin bununla belə qloballaşma şəraitində dilimizə yeni-yeni sözlər daxil olur. Aleksandr Lapşin Belarusda həbs olunub, Azərbaycana ekstradisiya edilib. Lapşinin adının qarşısında "blogger" sözü yazılır. Biz bu cür sözlərin qarşılığını tapmalıyıq".
M. Nağısoylu Orfoqrafiya lüğətinin təkmilləşdirilib yenidən çap olunacağını da vurğulayıb.
Filologiya elmləri doktoru, professor Buludxan Xəlilov isə deyib ki, Azərbaycan dili rus, fars, ərəb, yapon, ingilis və digər dünya dilləri ilə rəqabət aparmaq əzmindədir.
Öz növbəsində filologiya elmləri doktoru Əzizxan Tanrıverdi bildirib ki, Azərbaycan dili nə ərəb, nə fars, nə də rus dilinin təsirinə düşüb.
Konfrans çıxışlarla davam etdirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
