Dirijor Əyyub Quliyev beynəlxalq müsabiqənin qalibi olub

Dirijor Əyyub Quliyev beynəlxalq müsabiqənin qalibi olub
# 28 fevral 2017 11:50 (UTC +04:00)

Azərbaycan Dövlət Akademik Opera və Balet Teatrının dirijoru Əyyub Quliyev Almaniyanın Hamburq şəhərində keçirilən dirijorların beynəlxalq müsabiqəsində ("Debut in der Laeiszhalle") laureat adına layiq görülüb.

APA-nın məlumatına görə, müsabiqə Almaniyanın ən məşhur konsert salonlarından biri olan "Laysexalle" gerçəkləşib.

5 kateqoriya (dirijorluq, fortepiano, skripka, violonçel və bəstəkarlıq) üzrə keçirilən müsabiqənin nəticələrinə görə Xorxe Luis İçetequi (Venesuela) I mükafata, Əyyub Quliyev (Azərbaycan) II mükafata, Dmitri Kryukov (Rusiya) III mükafata layiq görülüblər.

Hamburq "Layse xalle" Filarmoniyası ve "Blackmore Group" musiqi agentliyinin təşkilatçılığı ilə keçirilən müsabiqənin bağlanış mərasimində qaliblər "Hamburq Klassik Philarmonie" orkestri ilə çıxış ediblər. Konsertdən öncə keçirilən rəsmi mərasimdə çıxış edən tanınmış bəstəkar Soren Nils Ayxberq qalibləri təbrik edib və onlara diplom və mükafatları təqdim edib.

Rəsmi hissədən sonra dirijorlar Əyyub Quliyev və X.İ.İçetequinin (Venesuela) rəhbərliyi ilə Hamburq orkestri digər ixtisaslar üzrə qaliblər - Dora Kokas (Macarıstan), Sun Qe Ji (Koreya), Oksana Şevçenko (Rusiya) ilə bərabər V.A.Mosart, L.Bethoven, E.Elqar və S.Prokofyevin simfonik və instrumental əsərlərini dinləyicilərə təqdim ediblər.

Qeyd edək ki, dirijor Ə. Quliyev bundan əlavə, İtaliyada keçirilən A.Toskanini beynəlxalq müsabiqəsi, V.Lütoslavski müsabiqəsi, D.Mitropulos müsabiqəsi və "Krayova" müsabiqəsinin qalibidir.

#
#

ƏMƏLİYYAT İCRA OLUNUR