Qaçaq Nəbi ilə Həcərin üç övladı olub – ŞOK FAKTLAR

# 13:35
26 aprel 2021

“Hamı, Qubadlı əhalisi, elə biz özümüz də indiyə kimi elə bilirdi ki, Nəbi ilə Həcərin övladı olmayıb. Həcər Nəbidən sonra Həmzə adlı bir kişi ilə ailə qurub və onların Zeynəb adlı qızı olub. Lakin sonradan Türkiyədə Mehmet Elturan adlı bir qan qohumumuz meydana çıxır, araşdırma aparır və öyrənir ki, Qaçaq Nəbi ilə Həcərin övladları olub”.

 

APA TV-nin xəbərinə görə, bunu Kulis.az-a müsahibəsində xalq qəhrəmanı Qaçaq Nəbi və Həcərin kötücəsi Həcər Əkbərova deyib.

 

Onun sözlərinə görə, Mehmet bəyin aşkara çıxardığı arxiv sənədlərindən məlum olur ki, Qaçaq Nəbinin üç övladı olub: Əhməd, Xəlil və Zeynəb. Sadəcə olaraq, Nəbi öldürüldükdən sonra onun düşmənləri uşaqlarını axtarmağa başlayır. Həcər irs daşıyıcıları olan oğlanlarını qohumlarının vasitəsilə Ağrı dağdan Qarsa adladır. Onları o vaxtkı çar hökuməti izləyir, öldürmək, həbs etməyə çalışırlar. Köçəndə hər şeyi özləri ilə apara bilmirlər, bircə Nəbi ilə Həcərdən qalan xalçanı aparırlar. Oğlanları böyük olub. Hətta Xəlil əlinə tüfəng alan yaşda imiş. Zeynəb azyaşlı olduğu üçün anasının yanında qalır. Həcər də sonradan Zeynəbi qorumaq üçün qohumu Həmzə ilə ailə qurur: “O vaxt qadının, üstəlik, düşməni olan qadının dul qalması qəbul olunmurdu. O, mütləq kiminləsə ailə qurmalı idi. Ona görə də Həcər kənd camaatını yığır, deyir, mənim Nəbiyə sadiq olduğumu bilirlər, amma mən adıma düşmən tərəfdən ləkə yaxılmasın deyə ailə qurmağa məcburam, ancaq mənə bacı deyən adama ərə gedəcəm. İlləri hesablasaq, Həcər Həmzə ilə evlənəndə yaşlı olub və dünyaya uşaq gətirmək imkanı olmayıb. Həcər Nəbidən sonra cəmi bir dəfə ərdə olub. Mənim atamın atası, yəni babam Əliş kişi Zeynəbin oğludur”.

 

Bəs “Nəbinin Həcərdən uşağı olmayıb” fikri hardan yaranıb?

 

Həcər Əkbərova qeyd edib ki, Nəbinin oğlanları Əhmədlə Xəlil bir yerdə Türkiyəyə getsələr də, sonradan ayrı düşürlər. Onlar Türkiyədə ailə qurur, bir-birinə qız alıb verirlər. Təzədən qohum olurlar ki, nəsil itməsin. Ancaq sonradan Xəlil İranın Maku şəhərinə köçür, Əhməd Türkiyədə qalır. Əhmədin Mehralı adlı oğlu varmış. Mehmet Elturan Mehralının oğludur. Xəlilin oğlu Ziyadın isə Bəhram adlı oğlu olur: “Zeynəbə gəlincə, burada Əlabbas adlı bir oğlanla ailə qurur. Onun oğlu dünyaya gəlir - mənim babam Əliş. Beləliklə, babam Nəbi ilə Həcərin nəvəsi, atam nəticəsi, mən və bacı-qardaşım isə kötücələri sayılırıq. Babam Qubadlıda müxtəlif vəzifələrdə çalışıb. Qubadlı işğal olunan zaman öz evini tərk etməyib, orda qalıb və şəhid olub. Heç vaxt özünə sığışdırmayıb ki, erməni gəlib onun torpağını alsın. Öz tüfəngi ilə xeyli sayda erməni öldürüb”.

 

Həcərin Nəbidən sonra erməni ilə ailə qurması haqda uzun illərdir dolaşan məlumatlara gəlincə, kötücəsi bunun əsassız şayiədən başqa bir şey olmadığını söyləyib. Elə Nəbinin dostu Şah Hüseynin arvadının sözü ilə öldürüldüyü haqda deyilənlər də rəvayət xarakteri daşıyır. Yəni onun namus üstündə öldürülməsi faktı yalandır. Çünki Nəbi öldürülən zaman Şah Hüseyn subay imiş. Nəbi Rusiyanın tapşırığı ilə tutulmuş buradakı casuslar tərəfindən öldürülür. Qatil Şah Hüseyn də ola bilər, başqası da.

 

Həcər Əkəbərova qeyd edib ki, Xəlilin törəmələrinin dediyinə görə, Nəbinin məzarı İranda - Lorni adlanan yerdədir. Onun Mehdi adında bir qardaşı olub. Nəbi rəhmətə gedəndə Həcəri ona vermək istəyiblər. Deyib, mən Həcərə öz bacım kimi baxıram. Amma bütün bunlar dildə-ağızda dolaşanlardır, dəqiq fakt yoxdur. Mehdinin gənc yaşda dünyasını dəyişməsi isə dəqiqdir. Həcərin məzarı isə Qubadlının Aşağı Mollu kəndindədir. O vaxtı Qubadlıda vəba xəstəliyi yayılıb. Həcər də vəba xəstəliyinə yoluxub və ondan vəfat edib.

 

Deyilənə görə, Həcər qarayanız, ancaq şirin qız olub. Nəbi də o qədər hündürboy deyilmiş. Həcərə həm də Dəli Həcər deyirmişlər. Silahdan çox yaxşı istifadə edirmiş. At belində gedə-gedə silahı çox dəqiq atırmış. Həcər və Nəbi ilə bağlı faktları yalnız onlarla silahdaş olan adamlar biliblər. Nəbi öldürüləndən sonra onun silahdaşlarının da bəzilərini öldürüblər. Həcər varlı, Nəbi kasıb ailənin övladı olub. Həcərin atası rəhmətə gedəndən sonra onlar ailə qurublar. Nəbi Həcəri qaçırdıb. Bəlkə də varlı qızını qaçırdığı üçün filmdəki kimi onun toyuna gəlməyiblər. O xanımın dediyinə görə Nəbi döyüşlərə Həcəri aparmaq istəmirmiş, Həcər deyirmiş, sən hardasan, mən də orda olacam.

 

Həcər Əkbərovanın sözlərinə görə, “Atları yəhərləyin” filmində Qaçaq Nəbi və Həcər haqqında faktlar Moskvadan gələn göstəriş əsasında təhrif olunub. Filmin rejissoru Həsən Turabov babasının yanına gələrək, təhriflərə görə ondan üzr istəyib. Filmin digər rejissoru Şeyx Əbdül Mahmudbəyov isə dünyaya gələn qızının adını Həcər qoyub.

 

Samirə Əşrəf

#
#

ƏMƏLİYYAT İCRA OLUNUR