Xəbərlər

SEPAH-ın polkovniki səfirliyimizə hücum planından danışıb

15:19

28 yanvar 2023

Azərbaycanın İrandakı səfirliyinə edilmiş terror hücumunun təsadüfi baş vermədiyi ilə bağlı faktlar ortaya çıxmaqdadır. Bu, hücumun əvvəlcədən planlaşdırıldığını bir daha təsdiqləməkdədir. Hələ bir neçə ay əvvəl SEPAH-ın Qüds bölməsinin rəhbərlərindən biri, polkovnik Həbib Babayi Ermənistandan yayımlanan, fəaliyyəti Azərbaycanda milli etnik zəmində qarşıdurma və təxribatlar üzərində qurulmuş internet tv-də separatçı Zabil Məhərrəmova müsahibəsində naxçıvanlı sürücülərə, eləcə də Azərbaycanın Tehrandakı səfirliyinə qarşı terror aktları planlaşdırdıqları barədə danışaraq hücumların anonsunu verib.

Həbib Babayinin anonsunu verdiyi terror aktı yanvarın 27-də həyata keçirilib. Bu kimi faktlar bir daha göstərir ki, yanvarın 27-də Azərbaycan səfirliyinə edilən xain terror hücumu əvvəldən xüsusi planla hazırlanıb, İran rəsmilərinin insidentin ailə-məişət zəminində baş verdiyini vurğulaması, hadisənin motivini dəyişməyə çalışması əsassızdır.

Xatırladaq ki, yanvarın 27-də Azərbaycanın İrandakı səfirliyinə edilmiş silahlı hücum nəticəsində səfirliyin bir əməkdaşı şəhid olub, ikisi yaralanıb. Hadisəni törədən şəxs tutulub.