MDB

Ana səhifə

MDB

Belarus ötən il Ermənistana 10 ədəd D-30 haubitsası satıb

05 avqust 2008 13:24 (UTC +04:00)

Bakı. Rəşad Süleymanov - APA. Belarus ötən il Ermənistana 10 ədəd 122 mm çaplı D-30 haubitsası satıb. APA-nın xəbərinə görə, bu barədə BMT-nin Adi Silahlar Registrinin təqdim etdiyi hesabatda bildirilib. Ötən il Belarus, əsasən Ermənistan, Eritreya və Sudana silah və hərbi texnika satıb. Belarus hesabat dövründə Sudan üçün 2 ədəd BTR-70 transportyorunun modernləşdirilmiş «Kobra K2K» və «Kobra K2» modifikasiyalarını, Eritreya üçünsə 9 ədəd «Uraqan» reaktiv yaylım atəş sistemi göndərib. Müqavilələrin dəyəri barədə məlumat verilmir. Hesabatda qeyd olunur ki, rəsmi Minsk Azərbaycana 2005-ci ildə 19, 2006-cı ildə isə 41 ədəd T-72 tankı göndərib. Bu müqavilələrin dəyəri də açıqlanmayıb.
Qeyd edək ki, D-30 haubitsaları silahlanmaya 1960-cı ildə daxil edilib. Çəkisi 3150 kq olan haubitsanın 1 mərmisinin çəkisi 14,08-21,76 kq, dəqiqədə atış tempi isə 6-8 mərmidir. D-30 haubitsaları 15,3 km məsafəyə atəş açmaq qabiliyyətinə malikdir. Bu artilleriya sistemləri, əsasən MDB, Şərqi Avropa, İran, Afrika və bir sıra Latın Amerikası ölkələrinin ordularının arsenalına daxildir.