Azərbaycan və Koreya ekoloji problemlərin həllində əməkdaşlıq edəcək

Azərbaycan və Koreya ekoloji problemlərin həllində əməkdaşlıq edəcək
# 26 noyabr 2008 13:36 (UTC +04:00)
Bakı. İlhamə İsabalayeva – APA-Economics. Bu gün Bakıda Azərbaycan Ekologiya və Təbii Sərvətlər Nazirliyi və Koreya Ətraf Mühit Nazirliyinin birgə təşkilatçılığı ilə «Azərbaycan-Koreya ətraf mühit sənayesi və texnologiyası» mövzusunda konfrans keçirilib. «APA-Economics»in məlumatına görə, Azərbaycanın ekologiya və təbii sərvətlər naziri Hüseynqulu Bağırov bildirib ki, iki ölkə ekoloji problemlərin birgə həlli üçün ilk dəfə olaraq, Birgə Şura yaradıb.
Nazirin sözlərinə görə, Koreya qısa müddətdə ekoloji problemlərin həllində böyük nailiyyətlər əldə edib. Koreyanın bu sahədəki təcrübəsinin Azərbaycan üçün çox yararlı ola bilməsini mümkün sayan nazir ondan istifadə etmək istədiklərini də söyləyib.
H.Bağırov bildirib ki, Azərbaycanda ətraf mühitin yaxşılaşdırılması ilə bağlı tədbirlər bir çox ölkədə olduğu kimi, 10, 100 illərlə davam etməli deyil: «Biz qısa müddətdə bunu həll etməliyik. Ən yaxşı təcrübə onu göstərir ki, bu, həmin ölkədə ətraf mühitlə bağlı sənayenin yaradılması ilə mümkün olur».
Koreyanın ətraf mühit nazirinin müavini Honq Cun Seon isə qeyd edib ki, 40 il əvvəl ən kasıb ölkələrdən biri olan Koreyanın iqtisadi və texnoloji inkişaf səviyyəsi xeyli yüksəlib.
Nazir müavininin sözlərinə görə, Koreya hökuməti «Yaşıl inqilab» şüarı altında ekoloji məsələlərin həlli üçün tədbirlər keçirməyə böyük əhəmiyyət verir: «Ekoloji məsələləri həll edə bilməsək, yaşayış səviyyəsini yüksəldə bilmərik. Bunun üçün də birgə yollar axtarıb tapmaq lazımdır».
Azərbaycanla bu istiqamətdə əməkdaşlığa önəm verdiklərini deyən Honq Cun Seon bu mövzuda növbəti konfransın Koreyada keçirilməsinin mümkünlüyünü də qeyd edib.
#
#

ƏMƏLİYYAT İCRA OLUNUR