AMEA-nın I vitse-prezdenti: “Müəssisələrin çoxu doktoranturaya yeni qəbul qaydalarının mahiyyətini dərk eləmir”

AMEA-nın I vitse-prezdenti: “Müəssisələrin çoxu doktoranturaya yeni qəbul qaydalarının mahiyyətini dərk eləmir”
# 26 yanvar 2011 14:44 (UTC +04:00)
Müəssisələrin əksəriyyəti yeni qəbul qaydalarına uyğun olmayaraq planlarını veriblər”. AMEA-nın I vitse-prezidenti Arif Həşimov APA-ya bildirib ki, verilən planlar reallığı əks etdirmir: “Həmin müəssisələr elə bilirlər ki, köhnə qaydada kim nə qədər istəyir plan yazıb verə bilər və ona uyğun da plan yeri ayrılacaq. Çoxları “Təhsil haqqında” qanunun tələblərinə uyğun tərtib olunmuş yeni qəbul qaydalarının mahiyyətini dərk eləmir. Bilmirlər ki, fəlsəfə doktoru, elmlər doktoru, bunlar hamısı təhsilin pillələridir. Bundan sonra dissertantura var. Bunların hamısını onlara izah etməyə məcbur oluruq. İlk dəfə belə plan tərtib etdiyimizə görə proses bizim gözlədiyimizdən də ağır gedir”.

A. Həşimov bildirib ki, ilkin olaraq AMEA-da əyani şöbədə fəlsəfə doktoru üzrə 170 yerin, qiyabi şöbədə 35 yerin ayrılması nəzərdə tutulur. Lakin təhlil sona çatana qədər bu rəqəmlərin dəyişəcəyi də gözlənilir.

A. Həşimov doktoranturaya ödənişli qəbulla bağlı müəyyən çətinliklərin yarandığını deyib: “Doktoranturaya ödənişli qəbulla bağlı təkliflərə hələ baxılır. Çünki doktoranturaya qəbul ilk dəfə aparıldığından çətinliklər yaranıb. Ödənişli qəbulla bağlı qiymətlər gərək Tarif Şurası ilə razılaşdırılsın. Bu, qəbula mane ola bilər. Ona görə də ilkin olaraq istəyirik ki, dissertantura pilləsində ödənişli qəbulu saxlayaq. Hələlik doktorantura pilləsində ödənişli qəbulu saxlamaq istəmirik. Elmlər doktoru pilləsinin əyani və qiyabi bölmələrində də ödənişli qəbulu saxlayıb-saxlamamaq barədə fikirləşirik. Elmlər doktoru bölməsi üzrə doktoranturada əyani təhsilin təqaüd məsələsini də hələ həll edə bilməmişik”.

Akademiyanın I vitse-prezidentinin sözlərinə görə, doktoranturaya qəbul mart-aprel aylarında keçirilə bilər: “Bu il doktoranturaya əlavə qəbulun aparılması hələ dəqiq deyil. Doktoranturaya qəbul zamanı müsabiqə böyük olsa, Nazirlər Kabinetinə doktoranturaya əlavə qəbulun aparılması ilə bağlı müraciət ediləcək”.
#
#

ƏMƏLİYYAT İCRA OLUNUR