Azərbaycanda növbəti Sosial Yeniliklər Düşərgəsi keçirilib

Azərbaycanda növbəti Sosial Yeniliklər Düşərgəsi keçirilib
# 27 iyul 2011 01:25 (UTC +04:00)
Bakı-APA. Bakının “AF Hotel” kompleksində Azərbaycanda sosial internet ideyalarının reallaşmasına dəstək verən sayca ikinci Sosial Yeniliklər Düşərgəsi baş tutdu.
Bu barədə APA-ya Sosial Yeniliklər Düşərgəsinin Layihə Koordinatoru
Rəşad Mehbaliyev məlumat verib.
O bildirib ki, düşərgənin münsifləri müxtəlif ölkələrdən (Azərbaycan, Böyük Britaniya, Çexiya, ABŞ) çoxillik təcrübəyə malik mütəxəssislər olub. Düşərgədə yarışmaq üçün seçilmiş iştirakçılar altı müxtəlif ideyalar ətrafında komandalara bölündülər. İdeya müəllifləri bu ideyaların həyata keçirilməsinə yardım edəcək insanlarla bir komandada işləyərək mükafat uğrunda yarışıblar. İdeyalar üzərində iş zamanı münsiflər komandalara öz təkliflərini verib, iradları bildirib, onların aradan qaldırılması üçün məsləhətlər veriblər.
İki günlük tədbirdə ideyalar inkişaf etdirilərək layihə şəklinə salınıb və layihələrin təqdimatı olub. Layihələrin qiymətləndirilməsi münsiflər heyəti tərəfindən aparılıb, cəmiyyət üçün daha yararlı hesab olunan iki komandanın layihəsi qalib gəlib və onların reallaşması üçün pul mükafatı təqdim edilib. Onlardan biri hər hansı çatışmazlığı və ya problemi olan insanların bu barədə məlumatı yaradılacaq sayta yazaraq digər sayt ziyarətçilərinin dəstəyini qazanması, digəri isə şəhər yollarında olan müxtəlif problemlər barədə insanlara operativ məlumat verilməsini nəzərdə tutur. Qalib gəlmiş ideyalara həmçinin konsaltinq xidməti də göstəriləcək.
Xatırladaq ki, düşərgənin əsas təşkilatçısı mərkəzi Praqada yerləşən “Transitions”, maliyyə donoru isə “IREX” təşkilatı olub. Düşərgəni keçirməkdə məqsəd əhalinin sosial tələbatlarına cavab verən internet ideyalarının reallaşdırılmasına maddi və təşkilati kömək etmək olub. Düşərgəni adı çəkilən təşkilatların nümayəndələri də izləyiblər. Azərbaycanda bu düşərgə ilk dəfə də məhz eyni təşkilatçı və donor tərəfindən ötən ilin sentyabrında keçirilib.
#
#

ƏMƏLİYYAT İCRA OLUNUR