Nazir müavini: Taksilərdə telefonla proses idarə olunduğu üçün taksometrin qoşulmasına gərək görmürük

Nazir müavini: Taksilərdə telefonla proses idarə olunduğu üçün taksometrin qoşulmasına gərək görmürük
# 24 iyun 2023 11:35 (UTC +04:00)

Qanun layihəsində taksometr anlayışı verilib. Bunun cihaz olması və proqram təminatı olması haqqında qeydlər var. Hazırda taksilərdə telefonla prosesin idarə olunduğunu gördüyümüz üçün yenidən taksometrin taksilərə qoşulmasına gərək görmürük.

APA xəbər verir ki, bunu Milli Məclisin bu gün keçirilən iclasında “Avtomobil nəqliyyatı haqqında” qanuna təklif edilən dəyişikliklərin müzakirəsi zamanı rəqəmsal inkişaf və nəqliyyat nazirinin müavini Rəhman Hümmətov deyib.

Nazir müavini bildirib ki, smartfondan istifadə etməyən vətəndaşlar olarsa, bu cihazı da qoşa bilərlər. O, reys qabağı müayinə məsələsinə də diqqət çəkib: “Sürücünün özü də reysqabağı müayinə olunacaq. Hazırda başqa ölkələrin də təcrübəsini nəzərə alaraq taksopark və qarajların yaradılması lazımdır. Vətəndaş və məmur təması olmaması üçün bu prosesi müasir cihazlar vasitəsilə quracağıq. Biz sadəcə, bu şəraitin sahibkar tərəfindən qarajlarda yaradılmasına nəzarət edəcəyik”.

Rəhman Hümmətov əlavə edib ki, fərdi sahibkarlar reysqabağı müayinə ilə məşğul ola bilər: "Bunu müəyyən yerli tibbi xidmət müəssisələri vasitəsilə edə bilərlər. Bu və ya digər məsələlərin təşkili üçün müəyyən vaxt lazım olacaq. Buna görə də qanun 1 oktyabrdan qüvvəyə minəcək".

#
#

ƏMƏLİYYAT İCRA OLUNUR