İnfrastruktur

Ana səhifə

İnfrastruktur

Azərbaycanda inşa olunan yeni yaşayış binalarında elektron qaz sayğaclarının quraşdırılmasına dair tapşırıq verilib

23 yanvar 2009 10:27 (UTC +04:00)

Bakı. Rəşad Süleymanov – APA-Economics. Azərbaycanda qaz abonentlərində sayğaclaşdırma işləri 98% yerinə yetirilib. «APA-Economics»in məlumatına görə, bunu «Azəriqaz» QSC-nin sədri Əlixan Məlikov bildirib.
Ə.Məlikovun sözlərinə görə, sayğaclaşmanın nəticəsi olaraq, qaz sərfi 10% azalıb. Smart-kart tipli elektron sayğacların quraşdırıldığı ərazilərdə isə bu göstərici daha yüksəkdir.
Smart-kart tipli sayğacların Gəncə şəhərində 35 min abonentdə quraşdırıldığını deyən «Azəriqaz» sədrinin sözlərinə görə, bu sayğaclardan sonra Gəncə şəhərində ödəniş səviyyəsində artım qeydə alınıb.
«Smart-kartlı sayğaclar quraşdırılmazdan öncə Gəncədə ödəniş 30% olduğu halda, bu gün 70%-dir. Hesab edirik ki, bu tip sayğacların ödəniş səviyyəsinin aşağı olduğu rayonlarda və Bakı şəhərində quraşdırılması müsbət nəticələr verər», - deyə Ə.Məlikov vurğulayıb.
«Azəriqaz» rəhbəri tikinti şirkətlərinə yeni tikilən çoxmərtəbəli binalara smart-kartlı sayğacların quraşdırılması barədə tapşırıqların verildiyini bildirib.
Qeyd edək ki, hazırda «Azəriqaz»ın ümumilikdə 1,2 mln. abonenti var.