Turizm

Ana səhifə

Turizm

Azərbaycan İpək Yolu Strateji Təşəbbüs proqramı çərçivəsində İsveçrədə təşkil olunan tədbirdə iştirak edib

12 iyun 2012 11:46 (UTC +04:00)

Bakı. Ülkər Rəşidqızı - APA. Azərbaycan Turizm İnstitutunun Beynəlxalq əlaqələr şöbəsinin müdiri Şəhla Əhmədova bu günlərdə İsveçrənin Lozanna şəhərində Dünya Turizm Təşkilatı (DTT) və Lozanna Hotelçilik Məktəbinin (EHL) birgə təşkil etdiyi İpək Yolu Strateji Təşəbbüs proqramı çərçivəsində keçirilən tədbirdə iştirak edib.
APA-nın məlumatına görə, tədbirin gündəliyinə əsasən Lozanna Hotelçilik Məktəbinin tələbələri proqramda iştirak edən ölkələrin İpək Yolu üzrə turizm imkanlarını araşdırıb və strateji turizm planlarını hazırlayıblar. Azərbaycanla yanaşı, Albaniya, Türkiyə, Rusiya, Çin, Yunanıstan, İran, Cənubi Koreya, Ukrayna və Ermənistan haqqında hazırlanmış hesabatlar ölkə nümayəndələrinin iştirakı ilə dinlənilib və daha uğurlu qrup bütün nümayəndə heyəti qarşısında öz hesabatlarını təqdim etmək şansı qazanıb. Daha sonra adıçəkilən ölkə nümayəndələri ilə yanaşı, DTT-nin İpək Yolu Proqramının direktoru Alla Peressolova və əməkdaşı Johanna Devine, Lozanna Hotelçilik məktəbinin professor-müəllim heyəti və tələbələrin iştirakı ilə hər ölkənin qalib komandaları öz təqdimatlarını keçiriblər. Yekunda DTT və ölkə nümayəndələrinin yekdil qərarı ilə Azərbaycanı təmsil edən qrupun təqdimatı birinci yerə layiq görülüb.
İpək Yolu Proqramının direktoru Alla Peressolova onu da bildirib ki, qaliblər birinci yeri tutmaqla bərabər, Rusiya Federasiyasının Altay vilayətinə səfər etmək şansı da qazanıblar.