Prezident Kitabxanasında görkəmli dövlət və elm xadimi Əziz Əliyevin anadan olmasının 120 illiyi münasibətilə hazırlanan elektron resursun təqdimat mərasimi keçirilib.
APA-nın məlumatına görə, tədbir iştirakçıları əvvəlcə Oxu zalında təşkil edilən “Əziz Əliyev-120” sərgisi ilə tanış olublar. Kitabxananın direktoru Mayıl Əhmədov bildirib ki, Əziz Əliyevin Azərbaycanın dövlətçilik və elm tarixində özünəməxsus yeri var: “İxtisasca həkim olan Əziz Əliyev tibb elminə və səhiyyə sahəsinə sanballı töhfələr verib. Yüksəlişinin qarşısını almaq üçün o, repressiyaya məruz qoyulsa da, tutduğu yüksək vəzifədən uzaqlaşdırılsa da, sonradan bəraət almış, yenidən tibb sahəsində yeni-yeni uğurlara imza atıb. Harada işləməsindən, hansı sahəyə rəhbərlik etməsindən asılı olmayaraq Əziz Əliyev öz ölkəsinə, xalqına və sənətinə sədaqət nümunəsi göstərib”.
M. Əhmədov qeyd edib ki, Əziz Əliyevin anadan olmasının 120 illik yubileyi ilə bağlı Azərbaycan prezidentinin sərəncamına əsasən, müxtəlif tədbirlər həyata keçirilir: “Bu gün təqdim edilən “Görkəmli dövlət və elm xadimi Əziz Əliyev (1897-1962)” elektron resursu Əziz Əliyevin həyat və fəaliyyətini, onun zəngin irsini öyrənənlərə Prezident Kitabxanasının töhfəsidir. Resursda materiallar 9 bölmədə qruplaşdırılıb. Elektron nəşr Azərbaycan və rus dillərində hazırlanıb”.
Kitabxananın direktoru əlavə edib ki,http://azizaliyev.preslib.az/domenində yerləşdirilən “Görkəmli dövlət və elm xadimi Əziz Əliyev (1897-1962)” elektron resursu yeni materiallar əldə edildikcə daha da zənginləşdiriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
