Bakı. Könül Kamilqızı – APA. “2011-2015-ci illər üçün hemofiliya xəstəliyi üzrə Tədbirlər Proqramı”na uyğun olaraq Azərbaycanda hemofiliyalı xəstələrin dövlət reyestri yaradılıb. Səhiyyə Nazirliyi ilə Hemofiliyalı Xəstələrin Respublika Assosiasiyası tərəfindən birgə hazırlanan reyestr bütün hemofiliyalı xəstələrin Səhiyyə Nazirliyi tərəfindən tam nəzarət altına götürülməsinə imkan verəcək”.
Bu barədə APA-ya açıqlamasında Hemofiliyalı Xəstələrin Respublika Assosiasiyasının rəhbəri Gülnarə Hüseynova məlumat verib. O bildirib ki, Respublika Klinik Xəstəxananın nəzdində yerləşən Hemofiliya Mərkəzində artıq reyestr xidməti fəaliyyətə başlayıb. G.Hüseynovanın sözlərinə görə, hər bir hemofiliya xəstə mərkəzə daxil olarkən onun barəsində bütün məlumatlar- onun sağlamlıq durumu, nə qədər dərman istifadə edilməsi və digər məlumatlar elektron məlumat bankına daxil olur: “Bunun nəticəsində də həmin xəstə haqqında məlumatlar birbaşa Səhiyyə Nazirliyinin elektron məlumat bazasında əks olunur. Gələcəkdə bu internet şəbəkənin Gəncə və Şirvana da bağlanılması nəzərdə tutulur ki, həmin ərazilərdə yaşayan xəstələr barədə də məlumat Səhiyyə Nazirliyində qeyd olunsun”.
G.Hüseynova qeyd edib ki, bu günə kimi 1448 nəfər hemofiliyalı xəstə haqqında məlumat reyestr bazasına daxil olub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
