Amerika

Ana səhifə

Amerika

Obama Senatdan Rusiya ilə imzalanmış SHS barədə müqaviləni tezliklə ratifikasiya etməyi tələb edib

18 noyabr 2010 21:20 (UTC +04:00)

Bakı-APA. ABŞ prezidenti Barak Obama senatorları Rusiya ilə imzalanmış Strateji Hücum Silahları (SHS) barədə müqaviləni tezliklə ratifikasiya etməyə çağırıb.

Sentyabrın ortalarında Senatın beynəlxalq komitəsi sənədi palatanın tam heyətinə ratifikasiya barədə qətnamə ilə bir yerdə təqdim edib.

Noyabrın 17-də respublikaçı senator Con Kayl Senatın yanvar ayınadək müqaviləni müzakirə edəcəyinə şübhə ilə yanaşdığını bildirib. Onun sözlərinə görə palata indi digər məsələlərlə məşğuldur və bəzi senatorların sənədə dair sualları var. Bu bəyanat administrasiyanı təlaşa salıb, çünki əvvəllər respublikaçı senator müqaviləni dəstəklədiyini bildirirdi. Kaylın səsi demokratlar üçün çox vacibdir, çünki bir neçə respublikaçı senator da Kaylın fikri ilə şərik olduqlarını bildiriblər.

Noyabrın 2-də keçirilmiş Konqresə aralıq seçkilərdən sonra Senatdakı respublikaçı azlıq demokratlarla aralarında olan fərqi azaldıb. Beləliklə SHS barədə müqavilənin taleyi qeyri-müəyyən olmağa başlayır. Respublikaçılar hələ seçkilərə qədər administrasiyanın təşəbbüslərinin çoxunun qarşısını alırdılar, indi isə Obama kabineti Senatın yeni tərkibi ilə işləməkdə daha çox əziyyət çəkəcək.

Senatın sənədi ratifikasiya etməsi üçün Obama ən azı 14 respublikaçını öz tərəfinə çəkməli, Senatın üçdə ikisinin, yəni 67 senatorun səsini qazanmalıdır.

«Bu siyasi yox, milli təhlükəsizlik məsələsidir. Bu sonraya saxlanılacaq məsələ deyil... Bu nə demokratların, nə də respublikaçıların ideyası deyil, bu ABŞ milli təhlükəsizliyinin təmin olunması ideyasıdır», deyə Obama jurnalistlərə bildirib.

O xatırladıb ki, strateji hücum silahlarının azaldılması ideyasını həm demokrat, həm də respublikaçı prezidentlər dəstəkləyiblər. Obamanın çıxışı zamanı müqaviləni dəstəkləyən görkəmli respublikaçılar – keçmiş dövlət katibləri Madlen Olbrayt, Ceyms Beyker, Henri Kissincer, keçmiş Pentaqon rəhbərləri Uilyam Koen və Uilyam Perri zalda olublar.

Obama qeyd edib ki, müqavilə olmadan ABŞ Rusiyanın nüvə arsenalını təftiş edə bilməyəcək.

«Əgər biz məsələni uzatsaq, ABŞ-ın nüvə silahının yayılmaması sahəsindəki liderliyi zəifləyəcək», deyə ABŞ prezidenti bildirib.

Rusiya və ABŞ prezidentləri SHS barədə yeni müqaviləni 2010-cu il aprelin 8-də Praqada imzalayıblar. Tərəflər 7 il ərzində nüvə başlıqlarının sayını 1,55 minədək, strateji daşıyıcılar üçün mütləq həddi isə iki dəfədən artıq azaltmalıdırlar. Müqavilə Rusiya parlamentinin hər iki palatası və ABŞ Senatı tərəfindən təsdiq olunmalıdır.