Xəbərlər

İŞİD daha 3 nəfəri diri-diri yandırdı

10:40

7 fevral 2015

İŞİD terrorçuları üç iraqlını casusluğa görə diri-diri yandırıb. Edam İraqın Anbar vilayətində həyata keçirilib.

APA-nın "RİA Novosti" agentliyinə istinadən verdiyi məlumata görə, terrorçular casusluqda günahlandırılan şəxsləri camaatın gözü qarşısında diri-diri yandırıblar.

Edam edilənlər İraqın təhlükəsizlik qüvvələrinə qruplaşmaya dair məlumatların ötürülməsində təqsirli biliniblər.

Fevralın 3-də İŞİD əsir götürdüyü iordaniyalı pilot Muat əl Kəsasbehin edam səhnəsini əks etdirən kadrlar yaymışdı. İnternetdə yerləşdirilmiş video çarxda silahlıların dəmir qəfəsə salınmış iordaniyalı pilotun üzərinə benzin tökərək diri-diri yandırması səhnəsi əks olunmuşdu.

Bu arada, İraq və Suriyada beynəlxalq koalisiya hərbi təyyarələri terrorçuların mövqelərinə zərbələr endirib. Nəticədə Suriya ərazisində 30-dan çox İŞİD terrorçusu məhv edilib. APA-nın “İnterfaks” agentliyinə istinadən verdiyi xəbərə görə, hava zərbələri Rakka şəhərinin şərq və qərb hissələri yaxınlığına endirilib.

Bundan əvvəl isə İŞİD terrorçularının mövqelərinə 18 hava zərbəsi endirilməsi barədə məlumat yayılmışdı.