Xəbərlər

Dövlət Sosial Müdafiə Fondu Ağcabədidə “Açıq qapı günü” keçirib

18:09

24 fevral 2015

Dövlət Sosial Müdafiə Fondu (DSMF) “Açıq hökumətin təşviqinə dair 2012-2015-ci illər üçün Milli Fəaliyyət Planı”na uyğun olaraq, Ağcabədidə regional “Açıq qapı günü” - vətəndaş forumu keçirib.

APA TV-nin xəbərinə görə, "Sosial sığorta haqqının ödənilməsi gələcəyinizin təminatıdır” adlı tədbirdə sığorta ödəyicilərini və pensiyaçıları maraqlandıran çoxsaylı suallara aydınlıq gətirilib. İştirakçıların diqqətinə çatdırılıb ki, DSMF-nin müvafiq orqanlarla birgə həyata keçirdiyi tədbirlər nəticəsində işləyənlərin sosial müdafiəsinin və gələcək pensiya təminatı hüquqlarının qorunması məqsədilə qeyri-leqal əmək münasibətlərinin rəsmiləşdirilməsi və əmək haqlarının süni surətdə aşağı məbləğlərdə müəyyənləşdirilməsi hallarının qarşısının alınması təmin edilib. 2014-cü il ərzində DSMF-nin gəlirləri ötən ilin müvafiq dövrünə nisbətən 8,3% və ya 223 mln. manat, sosial sığorta gəlirləri isə 10,2% və ya 160,8 mln. manat artıb.

DSMF-nin şöbə müdiri Famil Qədimov deyib ki, tədbirin keçirilməsində məqsəd "Milli Fəaliyyət Planı"na uyğun olaraq DSMF-nin həyata keçirdiyi fəaliyyət istiqamətlərini vətəndaşların nəzərinə çatdırmaq və onları bu sahədə maarifləndirməkdən ibarətdir.

Tədbirə Ağcabədi ilə yanaşı Laçın, Zərdab və Ucar rayonlarından olan sığorta ödəyiciləri və pensiyaçılar da qatılıb.