Xəbərlər

Bakı-Sumqayıt yolunda ağır qəza: qəzet əməkdaşı dünyasını dəyişdi

10:23

2 iyul 2015

Bakıda ölümlə nəticələnən yol-nəqliyyat hadisəsi baş verib. APA TV-nin məlumatına görə, yol qəzası Bakı-Sumqayıt yolunun 6-cı kilometrliyində, Bakı Beynəlxalq Avtovağzalının yaxınlığında qeydə alınıb.

"VAZ-2106" markalı, 10 RX 385 dövlət nömrə nişanlı avtomobilin sürücüsü idarəetməni itirib. Nəticədə maşın daş yolayrıcına çırpılıb. Qəza zamanı avtomobilin sürücüsü, 1986-cı il təvəllüdlü Əsədullayev Cavid Əhməd oğlu hadisə yerində dünyasını dəyişib.

Sürücünün meyitini deformasiyaya uğramış avtomobildən çıxarmaq mümkün olmadığından, hadisə yerinə FHN-in Xüsusi Riskli Xilasetmə Xidmətinin əməkdaşları cəlb edilib. Cavid Əsədullayevin meyiti xilasedicilər tərəfindən avtomobildən çıxarılıb.

Qeyd edək ki, 29 yaşlı Cavid Əsədullayev "Zaman-Azərbaycan" qəzetinin əməkdaşı imiş. Qəzetin baş redaktoru Anar Qaraxancallı APA TV-yə açıqlamasında bildirib ki, o, "Zaman-Azərbaycan" MMC-nin yayım şöbəsinin poçtalyonu olub. Cavid bu gün ünvanlara çatdıracağı qəzetləri nəşriyyatdan götürüb, evinə gedirmiş.