Xəbərlər

Paytaxtda qarlı hava şəraiti ilə əlaqədar təcili yardıma müraciətlər 8 faiz artıb

13:24

2 yanvar 2016

Yeni il gecəsindən başlayaraq ölkə ərazisində havanın qeyri-sabit keçməsi təcili yardım stansiyalarına müraciətlərin sayına öz təsirini göstərib. 31 dekabr-1 yanvar aralığında təcili yardıma əhali tərəfindən verilən çağırışların sayında adi günlərlə nisbətdə artım müşahidə olunub. Bakı Şəhər Təcili və Təxirəsalınmaz Tibbi Yardım Stansiyası baş həkiminin müavini Oqtay Şahmalıyev APA TV-yə açıqlamasında bayram günlərində təcili yardım stansiyalarına edilən zənglərin ümumi sayında 8 faiz artımın olduğunu bildirib. Onun sözlərinə görə, çağırışlar əsasən ürək-damar və tənəffüs yollarının xəstəlikləri ilə əlaqədar olub. Oqtay Şahmalıyev hələlik stansiyaya qarlı hava şəraitində travmalarla bağlı müraciətlərin daxil olmadığını da qeyd edib.