Xəbərlər

Özünü FHN əməkdaşı kimi təqdim edən dələduz yaxalandı

15:59

14 mart 2016

Özünü Fövqəladə Hallar Nazirliyinin əməkdaşı kimi təqdim edərək, Qax, Zaqatala və Balakən rayonları sakinlərinin külli miqdarda vəsaitini dələduzluq yolu ilə mənimsəyən şəxs yaxalanıb.

APA TV-nin məlumatına görə, ötən ilin dekabr ayında bir qrup Zaqatala sakini Zaqatala Rayon Polis Şöbəsinə müraciət edərək, Naxçıvan Muxtar Respublikasında anadan olan, hal-hazırda Bakı şəhərində yaşayan 1966-cı il təvəllüdlü Toğrul Rza oğlu Adıgözəlov tərəfindən aldadılaraq, pullarının mənimsənildiyini bildiriblər.

Zərərçəkmişlərin sözlərinə görə, özünü Fövqəladə Hallar Nazirliyinin əməkdaşı kimi təqdim edən Toğrul Adıgözəlov komissiya üzvü olduğuna onları inandıraraq, 2012-ci ilin may ayında baş verən zəlzələ zamanı zərər görmüş evlərinin tikiləcəyinə söz verməklə külli miqdarda pullarını mənimsəyib.

Martın 12-də Zaqatala RPŞ əməkdaşlarının həyata keçirdiyi əməliyyat-axtarış tədbirləri nəticəsində Toğrul Adıgözəlov Bakı şəhərində tutularaq istintaqa cəlb edilib.

Keçirilən əməliyyatla T.Adıgözəlov saxlanılıb. Onun Qaxda 22, Zaqatalada isə 17 nəfərin hər birindən 1500-8000 manat aldığı müəyyənləşib. Həmin şəxsin əməllərindən zərər çəkmiş digər şəxslərin də Zaqatala Rayon Polis Şöbəsinə müraciət etmələri xahiş olunur.

Faktla bağlı cinayət işi başlanıb.