Xəbərlər

Astarada arvadının qulaqlarını kəsən ər həbs olundu - NƏHAYƏT!

13:07

7 oktyabr 2013

Azərbaycanın Astara rayonunda həyat yoldaşına dəhşətli işgəncələr verməkdə təqsirləndirilən rayonun Kələdəhnə kənd sakini, 33 yaşlı Çingiz Mehdiyevin həbs olunması barədə sanksiya verilib. Astara Rayon Polis Şöbəsinin növbətçi hissəsindən APA-ya verilən məlumata görə, Mehdiyev prokurorluğun sanksiyasına əsasən, həbs olunaraq istintaq orqanlarına təhvil verilib.

Astara Rayon Prokurorluğundan isə məsələ ilə bağlı hər hansı açıqlama verməkdən imtina ediblər.

Çingiz Mehdiyev 9 il öncə ailə həyatı qurduğu 28 yaşlı həyat yoldaşı Nisə Xəlilovaya qarşı zor tətbiq etməkdə, onun əl-qolunu bağlayaraq, işgəncələr verməkdə, müxtəlif bədən xəsarətləri yetirməkdə təqsirləndirilir. Faktla bağlı Astara Rayon Prokurorluğunda Cinayət Məcəlləsinin 145-ci maddəsi ilə cinayət işi başlanıb, araşdırma aparılır. Bir həftə Astara Mərkəzi Rayon Xəstəxanasının reanimasiya şöbəsində müalicə alan həyat yoldaşı Nisə Xəlilova isə hazırda palataya keçırilib.