Xəbərlər

Arvadı boşanmaq istədi, gedib qayınatasının 280 minlik evini yandırdı

14:27

2 yanvar 2023

Bakıda qayınatasının evini yandırmaq istəyən şəxsə hökm oxunub.

Bu barədə “Qafqazinfo” məlumat yayıb. Şərti adı Ramil Camalov olan şəxs su şüşələrinə yanacaq doldurmaqla əvvəlcədən hazırladığı “molotov kokteyl”lərini Xəzər rayonunda yerləşən həyət evinin pəncərəsinə atıb. İki ədəd plastik pəncərəni, bir ədəd pəncərə torunu, evin divarını və kondisionerin mühərrikini qəsdən yandıraraq 670 manat məbləğində əmlakı məhv edib. Eləcə də, yanğını söndürmək istəyərkən qayınatası yüngül dərəcəli yanıq xəsarətləri alıb.

Ekspertiza zamanı müəyyən edilib ki, evin qiyməti 280 min manatdır. Beləliklə, Ramil Camalov həm də külli miqdarda ziyan vurmaqla qəsdən əmlakı məhv etməkdə ittiham edilib.

O, bu əməli həyat yoldaşı ilə qısqanclıq zəminində yaranan münaqişə nəticəsində törətdiyini bildirib. Belə ki, bir müddət öncə arvadı ondan ayrılaraq atasıgilə gedib. Camalov yoldaşı ilə danışmağa cəhd etsə də, sonuncu onunla görüşməyib. Bundan sonra onun qaldığı evi yandırmaq qərarına gəlib. O, ifadəsində hadisəni törədərkən məqsədinin onları qorxutmaq olduğunu, başqa niyyətinin olmadığını bildirib.

Xəzər Rayon Məhkəməsi hökmü ilə Ramil Camalova 3 il 6 ay şərti cəza verilib. O, məhkəmə zalından azadlığa buraxılıb.