Xəbərlər

Azərbaycanda avtomobili sel apardı

18:30

17 may 2022

İsmayıllı rayonu ərazisindən keçən Girdiman çayına sel gəlib.

APA TV-nin yerli bürosunun xəbərinə görə, sel suları nəqliyyat vasitəsini aparıb. Rayonun Zərnava kənd sakini, 1988-ci il təvəllüdlü Ağayev Zamiq Tofiq oğlu idarə etdiyi 99-MV-259 dövlət nömrə nişanlı "UAZ" markalı avtomobillə Girdiman çayından keçərkən güclü sellə qarşılaşıb.

O, avtomobili çaydan çıxara bilməyib, sel suları avtomobili bir neçə dəfə aşıraraq aparıb. Sürücü Zamiq Ağayev müxtəlif dərəcəli bədən xəsarətləri alsa da, suda boğulmaqdan xilas olub. Sürücü yaxınlıqdakı insanların köməyi ilə sudan çıxarılaraq İsmayıllı rayon Mərkəzi Xəstəxanasına aparılıb.

Qeyd edək ki, Zərnava kəndinə getmək üçün vətəndaşlar Girdiman çayı üzərindəki piyada körpüsündən istifadə edirlər və avtomobil körpüsü olmadığı üçün nəqliyyat vasitələri ilə su az olduqda çayın içərisindən keçirlər. Bəzən çaya qəflətən gələn sel nəticəsində oradan keçən avtomobillərə, mal-qaraya ziyan dəyir, tələfat baş verir. Həmin ərazidə avtomobil körpüsünün inşasına böyük ehtiyac var.

Şahnəzər Bəşirov, APA TV, İsmayıllı