Xəbərlər

Azərbaycanda bu körpüdən keçmək üçün pul ödəmək lazımdır

20:18

27 oktyabr 2021

Gördüyünüz bu panton körpü uzun müddətdir ki, Kür çayı üzərində fəaliyyət göstərir. Yerli sürücülər yaxınlıqda təhlükəsiz körpünün olmasına baxmayaraq özlərini və sərnişinləri bu yoldan istifadə etməklə daim təhlükə təhlükə altına qoyurlar.

Sabirabadda Kür çayı üzərində Ulacalı və Quruzama kəndlərini birləşdirən panton körpü 20 ildir ki, fəaliyyət göstərir. Quraşdırıldığı vaxtdan bu günə kimi körpüdən istifadə pulludur. Müxtəlif vaxtlarda körpünü keçmək üçün fərqli ödəniş məbləğləri müəyyən edilib. Hazırda keçid haqqı 50 qəpikdir.

Eyni zamanda 10-15 km aralıda rayonun Surra kəndi ərazisində müasir körpü də fəaliyyət göstərir. Oradan istifadə tamamilə təhlükəsiz olsa da yerli sakinlər üzən körpüyə üstünlük verir. Sürücülər və sərnişinlər deyir ki, təhlükəli olsa da, pul ödəsələr də bu körpüdən istifadə onlar üçün əlverişlidir və yollarını bir-neçə dəfə qısaldır. Həm yanacağa, həm də vaxta qənaət edirlər.

- Bu körpüdən tez-tez istifadə edirik. Burdan Sabirabada Şirvana gedirik. Kəndə yaxın olduğuna görə burdan keçirik. Yol təhlükəli olsa da yaxın olduğundan burdan istifadə edirik... Hər dəfə yola 50 qəpik ödəyirik.”

- Körpüdən hər gün və ya gün aşıra istifadə edirik. Təhlükəli deyəndə bir az sınıq-salxaqlığı, narahatçılığı olsa da təmir edirlər düzəlir. Bu yol kəsə olduğundan bu körpü əlverişlidir.”

- Körpüdən hər gün istifadə edirəm. Bura yaxındır və heç bir təhlükəsi yoxdur. Su qalxanda daha narahat olur.”

Körpü bir neçə il əvvəl rayon sakini Adil Mirzəyev şəxsin öz vəsaiti hesabına kəndlər arasındakı məsafəni qısaltmaq məqsədi ilə quraşdırılıb. Uzunluğu 170 metr olan körpünün eni 5 metrdir. Körpü üzən dəmir qurğular üzərində metal lövhələrlə birləşdirilib. Suyun səviyyəsi qalxdıqda körpü də qalxır. Körpünün gözətçisi Hacıbala Mirzəyev deyir ki, körpüdən pulsuz keçənlər də olur: “20 ildir ki, körpü fəaliyyət göstərir. Buranın işçisiyəm. Burda yığılan pulla bura təmir olunur, vergi verilir. Sakinlər üçün bu körpü yaxındır. O biri körpü ilə getsələr 15 km uzaqdır. Qarabağ iştirakçıları qazilər pulsuz keçirlər. Bir az hay-küy salanları pulsuz buraxırıq.”

Sözü gedən körpü tikilənə qədər burada bərə fəaliyyət göstərib, insanların Kürün bir sahilindən o biri sahilində keçməsi üçün istifadə olunub. Hər halda insan təhlükəsizliyi vaxtdan da, puldan da qiymətlidir.

Əlibəy Zeynallı, Elçin Həsənov, APA TV