Bu dayanacaqlardan uzaq durun: 50 dəqiqə avtobus gözləyəcəksiniz
Sumqayıt sakinləri ictimai nəqliyyatla bağlı yaranan vəziyyətdən şikayətçidirlər.
Sakinlər bildirirlər ki, şəhərin mərkəzində 30-40 dəqiqə avtobus gözləməli olurlar. İntervallar pik saatlarda 50 dəqiqəyə çatır. Kart sisteminə keçiddən sonra vəziyyətin düzələcəyini düşünsələr də, ümidləri özünü doğrultmayıb. Ötən ilin noyabr ayının 21-dən kartla ödəniş dayandırılıb. Artıq bir ildən çox vaxt keçməsinə baxmayaraq, kart sistemi bərpa edilməyib.
Sakinləri dinlədikdən sonra üz tutduq "Sumqayıt Nəqliyyat-1" MMC-yə. Qurumdan şifahi olaraq problemə aydınlıq gətirildi. Bildirildi ki, kart sistemi yenidən 2023-cü ilin mart ayında tətbiq olunacaq və yaranan problemlər aradan qaldırılacaq.
Azərbaycan Yerüstü Nəqliyyat Agentliyindən isə bildirildi ki, 2022-ci il bitmək üzrə olsa da, Sumqayıt nəqliyyatı AYNA-nın idarəetməsinə verilməyib.
Sumqayıt Avtomobil Nəqliyyatı İlə Sərnişindaşıma İdarəsindən isə məsələ ilə bağlı şifahi olaraq bildirildi ki, proses artıq başlanıb, təhvil-təslimlə bağlı işlər aparılır. Ancaq prosesin nə vaxt başa çatacağı ilə bağlı dəqiq tarix bilinmir.