Xəbərlər

Ermənistan regionun Baxmutuna çevrilir - Ovannisyan

12:18

14 mart 2023

“Ermənistan regionda “Baxmut” olmaq yolundadır, çünki bəziləri hakimiyyəti saxlamaq üçün yeganə yolu bunda görür”.

Bunu Ermənistanda Alternativ Layihələr Qrupunun üzvü Vaqe Ovannisyan deyib.

O Gürcüstanın Baş naziri Qaribaşvilinin son bəyanatına istinad edərək, bildirib ki, eyni ssenari Ermənistan üçün də nəzərdə tutulub. Sitat:

“Gürcü baş nazir ölkədə sabitliyi pozmaqda əsas məqsədin Rusiyaya qarşı ikinci cəbhə açmaq olduğuna işarə edib. O, Gürcüstanın “ikinci Mariupol”a çevriləcəyini bildirib.

Tanış vəziyyətdir, hə? Ən azı bu ilin oktyabr-noyabr aylarından Ermənistan eyni istiqamətdə irəliləyir: biz neçə dəfə müsahibələr, məqalələrlə xəbərdarlıq etmişik ki, Praqadan sonra bu hakimiyyət tamam başqa oyun oynayır. KTMT ilə bağlı demarşlar, Rusiyanın Ermənistandakı mövcudluğunun təhlükəsizliyimizi təhdid edən amil kimi qiymətləndirilməsi, Qərbdən turist müşahidəçilərinin cəlb edilməsi və s. hamısı eyni ssenaridir”.

Sitatın sonu

Ovannisyan vurğulayıb ki, Ermənistanda “Baxmut ssenarisi”nə səbəb olan hakimiyyətdir.

Onun fikrincə, əslində Qaribaşvili bilmədən erməni reallığını bir neçə hissəyə bölüb: fəlakəti dayandırmağa hazır olanlar, fəlakət ərəfəsində müşahidəçi rolunda olanlar və Ermənistana fəlakəti özləri gətirənlər.