Xəbərlər

Helikopter qəzasında həlak olan DSX zabiti Beyləqanda dəfn olundu

15:25

2 dekabr 2021

Dövlət Sərhəd Xidmətinin helikopterinin qəzaya uğraması nəticəsində həlak olan hərbi qulluqçulardan biri, baş leytenant Fərid Nağıyev anadan olduğu Beyləqan rayonunda dəfn edilib.

APA-nın yerli bürosunun xəbərinə görə, şəhid hərbçi Beyləqan şəhərindəki Şəhidlər xiyabanında torpağa tapşırılıb.

Dəfn mərasimində Beyləqan və Xocavənd rayon ictimaiyyətinin nümayəndələri, Dövlət Sərhəd Xidmətinin rəis müavini, general-mayor Azər İbrahimov, şəhidin xidmət yoldaşları və rayon sakinləri iştirak edib.

Şəhidin atası Təyyar Nağıyev oğlu ilə qürur duyduğunu deyib: “Mən bu gün oğlum Nağıyev Fəridi dəfn elədim. O, Allahın uca bir məqamına ucaldı, Şəhidlik zirvəsinə ucaldı. Allah bütün şəhidlərimizə rəhmət eləsin. Allah bütün şəhidlərimizin yerini cənnət eləsin. İlk növbədə onların valideynlərinə, analarına və sonra atalarına səbir versin.”

Şəhidin tabutu bükülmüş Azərbaycan Bayrağı onun atasına təhvil verilib. Yaylım atəşi açılıb.

Vətən Sağ olsun!

Elgün Gəncimsoy,

Arzu Quliyev,

APA TV, Beyləqan