Xəbərlər

Lerikin bir neçə yaşayış məntəqəsi işıqsız qaldı

19:23

9 yanvar 2023

Qarlı hava şəraiti ilə bağlı Lerikin bir neçə yaşayış məntəqəsi işıqsız qalıb.

ötən axşamdan başlayaraq Lerikə güclü qar yağıb. Qarın hündürlüyü rayon ərazisinə 20 sm, dağlarda 35 sm-dir. Qar əsasən rayonun elektrik təsərrüfatına ziyan vurub. Bir neçə yaşayış məntəqəsinə elektrik enerjisinin verilişi dayanıb. Yollarda isə əsasən dağ kəndlərində problem yaşanır.

Lerik Rayon İcra Hakimiyyəti aparatının əməkdaşı Vüqar Mirzəyev APA-ya bildirib ki, 2500 abonenti əhatə edən yaşayış məntəqələrində elektrik enerjisinin verilişi dayanıb. Hazırda həmin kəndlərdə elektrik enerjisinin verilişinin bərpası üçün işlər aparılır.

“Azərişıq” ASC-dən bildirilib ki, son 24 saatda Azərbaycanda elektrik enerjisi təchizatı sistemində uzunmüddətli və böyük miqyaslı qəza baş verməyib.

Qurumun açıqlamasında deyilir ki, son sutka ərzində baş vermiş qəzalar lokal xarakter daşıyıb: “Gözlənilən qarlı-şaxtalı hava şəraiti ilə əlaqədar “Azərişıq” gücləndirilmiş iş rejimində çalışır. Baş verə biləcək qəzaların aradan qaldırılması üçün əlavə texnika və mal-material ayrılıb. Mövcud hava şəraiti ilə əlaqədar ölkə ərazisində bir neçə yerdə lokal xarakterli qəzalar baş verib və tez bir zamanda əməkdaşlarımız həmin qəzaları aradan qaldırıb. Hazırda ölkə ərazisində dayanıqlı və keyfiyyətli elektrik enerjisi təmin edilib.

Abonentlərdən xahiş edirik ki, baş verən hansısa qəza və kəsinti halları ilə əlaqədar 24 saat fasiləsiz fəaliyyət göstərən 199 saylı çağrı mərkəzi ilə əlaqə saxlayıb məlumat versinlər”-deyə məlumatda bildirilir.