Xəbərlər

Şirvanda polis bıçaqlandı

19:58

29 noyabr 2021

Şirvanda sahə müvəkkilinin əlinə bıçaqla xəsarət yetirən şəxs barəsində məhkəmə 3 aylıq həbs qətimkan tədbiri seçib.

Şirvan şəhərində yerləşən məcburi köçkün qəsəbəsində Mənzil Kommunal İstismar Sahəsinin (MKİS) rəisi Etibar Nəvəfocun iş otağına qəsəbə sakini 1988-ci il təvəllüdlü Xəqani Əliyev izahatın alınması üçün dəvət olunub. Polislə mübahisə edən Xəqani Əliyev Şirvan Şəhər Polis Şöbəsinin İctimai Təhlükəsizlik Bölməsinin sahə rəisi, polis baş leytenantı 1985-ci il təvəllüdlü Emin Budaqova əlindən bıçaqla xəsarət yetirib.

Məsələ ilə əlaqədar Daxili İşlər Nazirliyinin mətbuat xidmətinin Şirvan regional qrupunun baş inspektoru, polis baş leytenantı Nizam Həmidovun APA TV-yə bildirdiyinə görə, qeyd edilən hadisə noyabr ayının 26-da baş verib: “Xuliqanlıq hərəkətləri edən Xəqani Əliyev hadisə zamanı polis əməkdaşları tərəfindən saxlanılıb və barəsində Cinayət Məcəlləsinin 221.3 maddəsi ilə cinayət işi açılıb. Şirvan Şəhər Məhkəməsinin qərarı ilə Xəqani Əliyev barəsində 3 ay müddətində həbs qətimkan tədbiri seçilib”

Cinayət işi üzrə araşdırmalar davam etdirilir.