Xəbərlər

Yevlaxda “Gənc xilasedici və yanğınsöndürən” yarışlarının zona birinciliyi keçirildi

18:59

18 may 2022

Yevlaxda FHN-in Aran Regional Mərkəzində zona birinciliyi keçirilib.

APA TV-nin yerli bürosunun məlumatına görə, Fövqəladə Hallar Nazirliyinin Aran Regional Mərkəzinin əhatə etdiyi rayonların təhsil müəssisələri arasında “Gənc xilasedici və yanğınsöndürən” yarışlarının zona birinciliyi baş tutub. Fövqəladə Hallar Nazirliyinin təşkilatçılığı, Təhsil, Gənclər və İdman nazirliklərinin dəstəyi ilə keçirilən yarış “Kombinə edilmiş yanğın estafeti”, “Maneələr zolağı” və “Komandaların təqdimatı” adlı üç mərhələdən ibarət olub.

Gərgin mübarizə şəraitində keçən yarışların yekunlarına əsasən, Mingəçevir şəhər 13 nömrəli tam orta məktəb I yeri, Ucar rayon Qazqumlaq kənd 1 nömrəli tam orta məktəb II yeri, Xocalı rayon 4 saylı tam orta məktəb isə III yeri tutub. Yarışda fərqlənmiş komandalar müvafiq yerlər üzrə kubok və diplomlarla təltif olunub.

Birinci yeri tutan komanda “Gənc xilasedici və yanğınsöndürən” yarışlarının respublika birinciliyində iştirak etmək hüququ qazanıb.

Fuad Nazimoğlu

Mehdi Məmmədov

APA TV Yevlax