Xəbərlər

Zərdabın bu kəndi boşalır: “Gənclər kəndi tərk edirlər”

15:19

8 may 2023

Zərdab rayonunun Burunlu kənd sakinləri bərbad vəziyyətdə olan kənd yolundan şikayətçidirlər.

Uzun illərdi ki, avtomobil yolunda heç bir təmir-bərpa işləri aparılmayıb. Son təmir işi 10 il əvvəl yola çınqıl örtüyü döşənməsi olub. Artıq o da palçıqda itib-batıb.

Əlacsız qalıb rezin çəkmədən istifadə etməli olurlar. Sakinlər qışda palçıq, yayda toza görə gənc nəslin kənddə qalmaq istəmədiklərini və şəhərə üz tutduqlarını bildirirlər.

Sakinlər bildirir ki, palçıq elə bir həddə qalxır ki, uşaqları məktəb və ya bağçaya qucaqda aparmalı olurlar.

Məsələyə münasibət bildirən Zərdab rayonunun Burunlu kənd inzibati ərazi dairəsi üzrə İcra nümayəndəsi Şamo Hüseynov şifahi olaraq bildirdi ki, adı çəkilən kənd yolunun bərbad vəziyyətdə olmasından xəbərdardırlar: “Ümumi uzunluğu 24 kilometr olan Məlikli, Burunlu, Qoruqbağı və Sarı Qaya yolunun bərbad vəziyyəti ilə bağlı müvafiq qurumlara müraciət edilib. Gələn ilin dövlət proqramına salınıb. Vəsait ayrılan kimi yollar təmirə bağlanacaq ”- deyə nümayəndə qeyd etdi.