Bakı. Şəhriyar Əlizadə - APA. “Milli insan hüquqları institutlarının parlament, dövlət qulluqçuları və vətəndaş cəmiyyəti ilə əməkdaşlığı” mövzusunda tədbir keçirilib.
APA-nın məlumatına görə, tədbirdə çıxış edən ombudsman Elmira Süleymanova bildirib ki, Azərbaycanda müsbət dəyişiklər və uğurlar çoxdur: “Biz Milli Məclisə və dövlət orqanlarına 460-dan çox təklif vermişik. Onların 60 faizi artıq həyata keçirilib. Azərbaycanda məni narahat edən əsas məsələlərdən biri ana və uşaq ölümləridir. Çox təəssüflər olsun ki, biz bu cür xəbərləri tez-tez eşidirik. QİÇS xəstəliyi ilə bağlı vəziyyətdən çox narahatıq. Azərbaycanda bu xəstəlikdən əziyyət çəkənlərin sayı üç mini keçib. Düzdür bu xəstəliyin çarəsi hələlik tapılmayıb, ancaq qarşısını almaq üçün tədbirlər görmək olar”.
Daha sonra tədbirdə BMT-nin İnsan Haqları üzrə Ali Komissarlığı ofisinin Milli insan hüquqları institutları və regional mexanizmlər bölməsinin rəhbərinin müavini Afərin Şahidzadə çıxış edib. O deyib ki, milli insan hüquqları institutları insanlar üçün əlçatan olmalıdır: “Hüquqları pozulan şəxslər həmin institutla rahat şəkildə əlaqə qura bilməli və öz problemlərini çatdıra bilməlidirlər. Azərbaycanda bu qaydaya əməl edilir. Bundan əlavə, həmin institutlar müəyyən resurslara sahib olmalıdırlar ki, layihələr həyata keçirə, insanların hüquqların qoruya bilsin”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
