Atletika

Atletika

Azərbaycan Hava və Ekstremal İdman Növləri Federasiyasının Afrikaya ekspedisiyası 25 min AZN-ə başa gəlib

21 avqust 2009 09:27 (UTC +04:00)

Bakı. Elnur Məmmədli – APA. Azərbaycan Hava və Ekstremal İdman Növləri Federasiyasının prezidenti Hüseyn Bağırov federasiyanın ekspedisiya qrupunun Kilimancaro dağının Uhuru zirvəsinə yürüşünün nəticələri ilə bağlı bu gün mətbuat konfransı keçirib. APA-nın məlumatına görə, H. Bağırov bildirib ki, hər zaman digər ölkələrin araşdırmaçıları Azərbaycanı tədqiq ediblər: “Amma artıq biz də digər ölkələri tədqiq etməyə başlamışıq. Uhuru zirvəsi dünyanın 7 böyük zirvəsindən biridir. Biz avqustun 16-da gecə saat 01.00-da zirvəyə çatdıq. Ekspedisiya qrupunda 7 nəfər təmsil olunurdu. Zirvəyə çatmaq üçün ümumilikdə 140-150 km piyada yol qət etdik”.

H. Bağırov bildirib ki, bu yürüş elmi, idman, ideoloji və simvolik əhəmiyyət daşıyıb: “Bu vaxta qədər Azərbaycanda belə yürüş həyata keçirilməyib. Bununla sübut etdik ki, Azərbaycan idmançıları bunu edə bilər. Daha bu barədə ehtimalla danışmağa ehtiyac yoxdur”.

Federasiya prezidenti qeyd edib ki, ekspedisiyanın topladığı geoloji materiallar 3 ay tədqiq olunacaq və bundan sonra həmin materiallar Bakı Dövlət Universitetinin muzeyinin Afrika bölməsinə təqdim olunacaq.

Ekspedisiyanın baş tutmasına xərclənən vəsaitə gəldikdə H. Bağırov bildirib ki, bunun üçün ümumilikdə 25 min AZN xərclənib: “Bu yürüşə bir qəpik də olsun dövlət vəsaiti xərclənməyib. Tam olaraq özəl mənbələrdən istifadə edilib. Burada məqsəd gəlir götürmək deyil. Sadəcə çalışırıq ki, Azərbaycanda ekstremal idman növü ilə bağlı sistemi quraq. Digər tərəfdən mən avqustda 10 günlük məzuniyyətə çıxmışdım. Bu yürüş də məhz məzuniyyətim dövründə həyata keçirildi və 9 günə ekspedisiya başa çatdı”.

Mətbuat konfransından sonra ekspedisiya qrupunun Uhuru zirvəsinə yürüşü ilə bağlı qısa videorolik nümayiş olunub.

Qeyd edək ki, qrup dəniz səviyyəsindən 5895 metr yüksəklikdə yerləşən Uhuru zirvəsinə Azərbaycan bayrağını, eləcə də Heydər Əliyevin “Mən fəxr edirəm ki, mən Azərbaycanlıyam” və “Azərbaycan, yeni zirvələrə doğru İlhamla irəli” sözləri yazılmış vımpelləri qaldırıb.

Afrika_ekspedisiya