Atletika

Atletika

Gəncədə Oyun Festivalı təşkil edilib

21 may 2011 21:29 (UTC +04:00)

Bakı-APA. Azərbaycan Milli Olimpiya Komitəsi Gəncə şəhər İcra Hakimiyyəti, Gənclər və İdman idarəsi Gəncə Olimpiya Kompleksində “İdman Qadınlar üçün! Qadınların həyatında! Qadınlarla birgə!” layihəsi çərçivəsində Oyun Festivalı təşkil edib. APA-ya Gənclər və İdman Nazirliyindən verilən xəbərə görə, Festivalda Milli Olimpiya Komitəsinin, Gəncə şəhər Gənclər və İdman, Təhsil və aidiyyatlı digər idarələrin, idman federasiyalarının, həmçinin yerli təşkilatların nümayəndələri iştirak edib.
“İdman Qadınlar üçün! Qadınların həyatında! Qadınlarla birgə!” layihəsi Beynəlxalq və Avropa Olimpiya Komitələrinin, həmçinin Bakcell və Coca-Cola şirkətlərinin maliyyə və texniki dəstəyi ilə həyata keçirilir. Sosial inkişaf yönümlü layihələrin hazırlanması və icrası sahəsində ixtisaslaşan “Sosial Xidmətlər Təşəbbüsü” İctimai Birliyi layihənin əsas icraçı partnyorudur.
Əsasən şən, inkluziv və təhlükəsiz idman hərəkətlərindən ibarət Oyun Festivalı “Sosial Xidmətlər Təşəbbüsü” və Milli Olimpiya Komitəsindən olan mütəxəssislərin köməkliyi ilə Gəncə şəhər Mir Cəlal Paşayev adına 39 saylı, Mehdi Mehdizadə adına 4 saylı və İsrafil Məmmədov adına 27 saylı orta ümumtəhsil məktəbindən olan fiziki tərbiyə müəllimləri tərəfindən tərtib edilib. Festivalın keçirilməsində əsas məqsəd Olimpiya hərəkatı və Olimpiya dəyərlərini təşviq etmək, o cümlədən Oyunların ruhlandırıcı gücündən istifadə etməklə insanların, xüsusilə qadınları və qızları idman və bədən tərbiyəsindən kütləvi və mütəmadi istifadə etməyə həvəsləndirmək idi.
Festivalı giriş sözü ilə açan Gəncə şəhər Gənclər və İdman İdarəsinin rəis əvəzi Mahir Hüseynov bu kimi tədbirlərin xüsusi əhəmiyyətini vurğulayaraq, bunun uşaqların və gənclərin idman ruhu ilə tərbiyə edilməsində mühüm rol oynadığı söylədi. Sonra Milli Olimpiya Komitəsinin nümayəndəsi Vaqif Əliyev çıxış etdi və hazırda dünyada geniş vüsət alan və sürətlə inkişaf etməkdə olan Olimpiya hərəkatından və Olimpiya dəyərlərindən danışdı. Rəsmi hissənin sonunda layihənin koordinatoru Mehman Kərimov çıxış edərək layihənin yaranma tarixçəsi, bunu zəruri edən amillər və layihənin əsas fəaliyyət istiqamətləri haqda ətraflı təqdimat etdi. Daha sonra meydançaya 39, 27 və 4 saylı məktəbin şagirdlərindən ibarət yarış komandaları dəvət olundu. Şən, inkluziv və təhlükəsiz oyunlardan ibarət hər bir nömrə Olimpiya idman növləri (futbol, tennis, xokkey, basketbol və s.) əsasında hazırlanmışdır.
Ümumilikdə, “İdman Qadınlar üçün! Qadınların həyatında! Qadınlarla birgə!” kütləvi idman və bədən tərbiyəsinin sosial, iqtisadi, mədəni və s. inkişaf komponentlərini özündə birləşdirən araşdırıcı və təşviqedici fəaliyyətlərdən ibarətdir. Nəticə etibarı ilə bütün bu fəaliyyətlər qızlar və qadınlar arasında daha aktiv və sağlam həyat tərzi sürməyə xidmət edən şəraitin yaradılmasına yönəlib.