Atletika

Ana səhifə

Atletika

Velosiped idmanı üzrə Azərbaycan çempionatı keçilib

03 sentyabr 2012 15:44 (UTC +04:00)

Bakı – APA. Velosipedçilərin çoxgünlük ötüşmələr üzrə Azərbaycan çempionatın keçirilib. APA-nın xəbərinə görə, yürüşdə müxtəlif yaş qruplarından olan 41 idmançı fərdi və qrup şəklində iştirak edib.

4 mərhələdə keçirilən çempionatın birinci mərhələsində velosipedçilər Xudat-Nabran-Yalama marşrutu ilə 120 kilometr məsafə qət ediblər. Növbəti mərhələlərdə qrup yarışları Quba-Xudat-Qusar-Quba marşrutu üzrə keçirilib. Sonuncu mərhələdə Quba şəhəri və rayonun İspik kəndi arasında fərdi ötüşmə təşkil olunub. Ümumilikdə velosipedçilər 500 kilometrə yaxın məsafə qət ediblər.

Çempionatının ümumi nəticəsinə görə, U23/elit yaş qrupunda 1-ci yeri Ruslan Mustafayev, 2-ci yeri Elmar İsmayılov, 3-cü yeri Akif Abdullayev tutub.

U17-lərin yarışında 1-ci yeri Ceyhun İlyasov, 2-ci yeri Ruslan Həsənov, 3-cü Elgün Əlizadə, U15-lərin yarışında isə 1-ci yeri Maksim Naperstkov, 2-ci yeri Zahid Əliyev, 3-cü yeri Tural Xanməmmədov tutub.

Xatırladaq ki, bu yaxınlarda velosipedçilərimizdən ibarət milli komandamız Niderlandda təşkil olunan 48-ci Avropa Velosiped Turunda və Avropa çempionatında çıxış ediblər. Azərbaycan milli komandasının üzvü Nicat Niftaliyev Avropa Velosiped Turunda Kriterium yarışında 3-cü yeri tutmuşdu.

Bundan başqa, milli komandamızın üzvləri Elçin Əsədov Azərbaycan müstəqilliyini qazandıqdan sonra ilk dəfə olaraq velosiped idmanı üzrə Dünya Çempionatına vəsiqə qazanmışdı. 16-24 sentyabr tarixlərində Niderlandda keçiriləcək Dünya Çempionatında Elçin Əsədov həm qrup ötüşməsində, həm də fərdi ötüşmədə bəxtini sınayacaq. Onun komanda yoldaşı Tural İsgəndərov isə 19-23 yaş kateqoriyasında fərdi ötüşmədə iştirak edəcək.